Towards Better Tourismip siunertaraa takornariaqarnermik aallutaqartut katersuutsissallugit oqaloqatigiinnikkut ineriartoqatigiinnissaq, ilisimasanik taartigeeqatigiinneq, isummersoqatigiinneq pituttorsimananilu suleqatigiinneq sinaakkusersorumallugit. Ataatsimeersuartitsinerup siunertaraa takornariaqarnermik aallussisut, aalajangiisartut sammisamullu soqutigisaqartut angorusutaat ataatsimut ersarissumik siunnerfilersinnissaat anguniarneqassasoq.
Towards Better Tourism 2018-imi ataatsimeersuarnerup Towards More Tourismimik qulequtaqartup nangeqqinneraa. Taamani ataatsimeersuartoqarmat Kalaallit Nunaanni takornariartitsinerup iluani innersuutit 11-t pilersinneqarput, innersuutillu taakku Visit Greenlandip ukiunut 2021-2024 iliuusissiaanut toqqammaviupput.
“2018-ip kingorna pisimasoqaqaaq, ingammik coronap siammartilertornerata kingunerisaanik nunani ataasiakkaani nunallu tamalaat akornanni takornariaqarnermut pissutsit allanngorsimaqaat. Naqqaniit aallarteqqinnianngilagut, misilittakkavulli naapertorlugit pilersitseqqinniarpugut innersuutaasimasullu nutarterlugit. Ukiuni kingullerni naleqartitat annertuumik allanngorsimaqisut takusimavarput, tassani eqqarsaatigaagut takornariartitsisarnerup ornitassallu ineriartortitsivigineqarsimaneri, taamatullu tikeraartussat kissaataat piumasaqaatigisartagaallu. Siusinnerusukkut isumaliutigisarparput qanoq pissarsillutalu iliuuseqarnerusinnaanersugut, nalitsinni pingaartinneqarnerulerpoq qanoq pitsaanerusinnaanersugut. Naleqartitat taamatut nikinnerat Visit Greenlandimi iliuusissatut pilersaarusiornitsinni inissaqartissimavarput, taama nassuiaavoq Visit Greenlandip pisortaa, Anne Nivíka Grødem.
Ataatsimeersuartitsineq Nunatsinni takornariaqarnermik aallussisorpassuarnut annerusumik naatsorsuussaavoq, sammisassarpassuit akornanni Nunatsinneersunik nunallu tamalaat akornanneersunik oqalugiartoqartoqartassaaq. Ullut pingasut ingerlaneranni saqqummiisut soqutiginartut, workshopit, ataqatigiissaarinerit misilittagallillu oqallitsinneqartarneri ingerlanneqassapput.
Sammisassat aaqqissuunneqarsimapput akunnerulersitsinissaq pilersitseqatigiinnissarlu peqataasut 100-t sinnerlugit akornanni pilersinniarlugu, nammineq misilittakkat, ilimatsaassat, takorluukkat ilisimasallu ataatsimeersuarnerup ingerlanerani taartigeeqatigiissutigisassanngorlugit. Aaqqissuisut kissaatigaat peqataasut periarfissaq atorluassagaat oqallinneq tamanut pisuunnguallaataasooqqullugu taamatullu ataatsimeersuarnerup ingerlarnga ajunngitsumik sunniuteqarfigalugu. Ataatsimut siunnerfeqarluni takorluugaqarnissaq anguniagaqarnissarlu pingaartinneqassapput iliuusissat pingaarnersiuinerillu tigussaasut pilersinneqarsinnaaqqullugit.
“Takornariaqarnermik sammisaqartut ulluinnarni Sineriammi siammasissumik inissisimaffeqarput, tamanna pissutigalugu sinaakkutissat ataqatigiinnermik annertusaallutillu nukittorsaataasinnaasut pilersinnissaat uagutsinnut pingaaruteqarpoq. Mittarfissuassat annertoqisumik aningaasaliiffigineqarsimasut atorluassagutsigit pingaaruteqarluinnarpoq nukittuumik suleqatigiinnissarput, tassanilu pingaaruteqarluinnarpoq peqatigiilluta piujuartitsinissaq salliutillugu takornariaqartitsinermik aallussinissarput, inooqatigiinneq, aningaasaqarneq avatangiisillu eqqarsaatigalugit”, taama oqarpoq Visit Greenlandip siulersuisuini siulittaasoq Anette Lings, nangipporlu,
“Ineriartornissaq eqqarsaatigalugu ataqatigiissaakkamik iliuuseqarneq suleqatigiinnerlu suliniutinik ineriartortitsiviusunik kinguneqarsinnaavoq Nunatta tamarmi iluaqutigisinnaasaanik. Aammattaaq kissaatigaarput nunat tamalaat akornanni Kalaallit Nunaata tusaamaneqarnera annertusarneqassasoq, nunatut ornissallugu ilisimallugulu pilerigineqartutut misigisassarsiorfissaqqissutullu. Tassanilu salliutinneqassapput pitsaassuseq, isumannaatsuussuseq piujuartitsinerlu.
Isummat saqqummiunneqartut inerniliinerillu tamarmik katersorneqassapput Kalaallillu Nunaanni takornariaqartitsineq piujuartitsinermik pingaartitsisoq, nutaaliortoq akisussaaffimmillu pingaartitsisoq pilersinniarlugu iliuusissiassamut ikkussuunneqassallutik. Towards Better Tourism aamma immikkooruteqarluinnartumik periarfissatsialaavoq siunissami takornariaqartitsinissap qanoq ittuunissaanut sunniuteqarfissatut, sulilu nukittunerusumik pitsaanerusumillu takornariaqartitsineq eqqarsaatigalugu Nunatta iluaqutissaanik pilersitsivissatut.
Ulloq sumiiffissarlu:
Towards Better Tourism ingerlanneqassaaq apriilip 25-annit 27-annut 2023 Hotel Hans Egedemi Nuummiittumi. Paasissutissat, oqalugiartussat il.il. una LINK aqqutigalugu aaneqarsinnaapput
Saaffigineqarsinnaasut:
Tanny Por – Head of International Relations
E-mail: tanny@visitgreenland.com
Oqarasuaat: +45 20 76 96 90
Continues further down the page...
