Savalimmiut, Island aammalu Kalaallit Nunaata akornanni, nunani avannarlerni killerni takornarialerinikkut kattuffimmit NATA – North Atlantic Tourism Association-imit angalanermik nittarsaassineq aaqqissuunneqarpoq. Ukioq mannalu Savalimmiut nittarsaassinermi aaqqissuussisuuvoq, uanilu sapaatip akunnerani takornarialerisut ataatsimoortillugit nunarsuarmit tamarmit angalatitsinermik ingerlatsisunik ataatsimeeqateqartinneqassapput.
Ataasinngornermi ullaap tungaani nunat immikkoortuini takornariaqarnermut siunnersuisooqatigiittut taaneqartartunik Destination Management Organizations (DMO-nik), takornariaqarnerup ineriartornerani suleqatigiinnerup nukittorsarneqarnissaanik aammalu nuna akimorlugu ataqatigiisitsiniarnerup qaffassarneqarnissaanik siunertalimmik Visit Greenland isumasiuititsivoq. Sammisassat ilaatigut takornarialerinermut inatsimmut, takornarialerinermik immikkoortortanut pilersaarusiornermut aammalu Kalaallit Nunaata nittarsaanneqarneranut tunngasuupput.
Ataasinngornermilu unnukkut aaqqissuussap saniatigut, ileqquusoq malillugu Visit Greenlandip aaqqissortakkaminut kalaallit takornarialerisut qaaqqunikuuvai. Aaqqissuinerlu toqqaannartumik aallakaatinneqarluni malinnaaffigineqarsinnaasimavoq, taamaalilluni takornarialerisut takkullutik peqataasinnaanngitsut toqqaannartumik ungasianiik malinnaasinnaanngortinneqarsimallutik. Aaqqissuussamilu pilersaarutit malillugit Inuussutissarsiornermut, Niuernermut, Aatsitassanut, Inatsisit atuutsinneqarnerannut Naligiisitaanermullu Naalakkersuisoq Naaja H. Nathanielsen, takornariaqarnermut inatsimmik kiisalu takornarialerinermik immikkoortortanut pilersaarummik saqqummiivoq. Taassuma saniatigut Air Greenland, Icelandair kiisalu Greenland Airports timmisartuussinissaminnut angallannerullu ineriartortitsinissaanut pilersaarutitik pillugit kiisalu mittarfissuit nutaat ammarneqarnerisa kingorna, siunissami angalariaatsit qanoq sunnerneqarnissaat pillugit naatsorsuuteqarnerminnik saqqummiipput.
Naggasiullugu Kalaallit Nunaanni akisussaassuseqartumik takornarialerinerup iluani immikkut suliniuteqarsimalluni takornarialerisumut nersuiniarluni, Grenland Tourism Award 2024-mi ajugaasoq suaarutigineqarpoq. Visit Greenland Air Greenlandilu suleqatigiillutik nersornaammik tunniussipput. (Tamanna pillugu tusagassiutitigut nalunaarut immikkut ittoq nassiunneqareerpoq.)
Pisortatigoortumik Vestnorden-imi pilersaarutit pingasunngornermi naammassineqarput, taassumalu kingorna angalatitsivinnut, angalatitsinermik ingerlatsisunut tusagassiortunullu toqqakkanut Visit Greenland Air Greenlandilu Kalaallit Nunaannut angallassivoq. Kalaallit Nunaanni ornitassanut najukkamilu takornarialerisut eqqarsaatigalugit, tikeqqaarnermi misigisassat siulliit peqataasunut misigitinneqarnissaat angallassinermi siunertaavoq, taamaalillutik misigisassat peqataasunit paasineqarluarneruniassammata pisisartuminnullu nittarsaassilluarnerussallutik. Angallassinermilu peqataasut toqqartugaapput, taamaalillutik peqataasut atuisui najukkami takornarialerisunut taakkulu nioqqutaannut tulluussagaallutik. Sisimiunut Nuummullu angallassisoqarnerani, nunap immikkoortuini takornarialerinermi siunnersuisooqatigiit takornarialerinikkullu inuussutissarsiuteqartut qanimut suleqatiginerisigut tamanna aaqqissuuneqarpoq.
Vestnorden tassaavoq suliffeqarfinniit suliffeqarfinnut (business to business) angalanermik nittarsaassivik, nunani avannaamioqatigiit killiini ornitassanut takornarissanut tulluuttunut pilerisaarinissamik ukkassiviusoq, aammalu piujuartitsilluni ineriartornermut – aningaasaqarnikkut, inooqataanikkut avatangiisitigullu pitsaasumik tapersiissuteqarfiusartoq. Angalatitsinermik ingerlatsisut kiisalu tusagassiortut tulluartut aaqqissuisunit toqqarneqarsimapput, susassaqartut tulluartut qulakkeerniarlugit.
Peqataasunut sinaakkutit eqqortut pilersinnissaat siunertaavoq, taamaalillutillu peqataasut akunnerminni ataatsimeeqatigiinnerit inniminnikkat aqqutigalugit imminnut naapinnissaminnut periarfissinneqarlutik, naapeqatigiinnerillu aqqutigalugit nunani tamalaani angalatitsinermik ingerlatsisut nunanilu avannarlerni killerni takornarialerisut suleqatigiinnikkut nutaanik isumaqatigiissusiornissaat pingaarutilinnillu atassuteqaqatigiilernissamik pilersitsiortornissaat nittarsaassinermi siunertaapput.
Vestnorden-imi nittarsaassinermik aaqqissuisoq tassaavoq suliniaqatigiiffik North Atlantic Tourism Association, tassanilu nunani avannarlerni killerni takornariaqarnermik suleqateqarnissamut nittarsaassinissaq siunertarineqarpoq. Visit Faroe Islands, Visit Iceland aamma Visit Greenland paarlakaajaallutik nittarsaassinermut aaqqissuisarput.
Vestnorden paasisaqarfiginerujumallugu iserfissaq https://vestnorden.com/
Continues further down the page...
