Oqaluttuarisaanermi siullerpaamik Amerikamiut timmisartortitseqatigiiffiannit Kalaallit Nunaannut toqqaannartumik timmisartuussisoqartalissaaq, aasaaneranilu angallaffiunerpaanerata nalaani (juunimit septembarimut) sapaatip-akunneranut marloriarluni timmisartuussisoqartassalluni.
Tamanna Amerikap Avannaamiuinut Kalaallit Nunaanni illoqarfiit pingaarnersaannuinnaq pinnatik aammali nunap immikkoortuinut allanut angalarusuttunut nutaarsiassatsialaavoq. Nuummi aqqusaarlugu Kalaallit Nunaannut tamarmut angallavissat ammaanneqassapput.
New Yorki Amerikami Avannarlermi timmisartoqarfittut pingaarutilittut inissisimammat USA-mit tamarmeersut ajornannginnerusumik Kalaallit Nunaaliarsinnaanngorput. Nuullu nunanit tamalaaneersunit tikiffigineqarsinnaasumik mittarfeqalernermigut Kalaallit Nunaannut tamarmut angallassiviulerpoq:
“Nuup nunanit tamalaaneersunit tikiffigineqarsinnaasumik mittarfeqalernera Kalaallit Nunaata oqaluttuarisaanerani eqqaaneqartartussat ilagilerpaat. Angallannermimmi allannguisuuvoq, maanna timmisartorsuit nunanit allaneersut Kalaallit Nunaanni illoqarfiit pingaarnersaannut toqqaannartumik angalasinnaanngormata,” Anne Nivíka Grødem, Visit Greenlandimi pisortaq, oqarpoq.
Kalaallit Nunaannut takornariat amerliartuinnarnerat ilutigalugu inuiaqatigiit tamaaniittut atugarissaarnerulissammata Anne Nivíka Grødemip nunamut tamarmut iluaqutaasussat erseqqissarpai:
“Kalaallit Nunaannut takornariartarneq ornigarneqarnerusuinnarnut tunngassuteqanngilaq. Isumaqarpugut tamanna Kalaallit Nunaannut tamarmut pitsaasumik sunniuteqassasoq. Takorniarniartullu kajumissaartarumaarpavut nunatta isertai alianaatsut ornigarneqarnerusut saniatigut ornigartaqqullugit. Kalaallit Nunaannut pinngortitarsuarmullu tamaaniittumut nalissaqanngitsumut misigisassarsioqqullutit tikeraaqqussavatsigit, taamaattumik misigisassarsiornissannut piaarersimaniarna!”
Aqqutip nutaap ammarneratigut Kalaallit Nunaat nunanit allanit siornatigornit tikikkuminarnerulerpoq, Nuummiinnaanngitsorlu aammali Kalaallit Nunaata sinnerani pinngortitarsuarmi nalissaqanngitsumi inuiaqatigiinnguanilu tamaaniittuni misigisassarsiornissamik periarfissiilluni.
Continues further down the page...
