Ingerlatsivimmi maannamut siulittaasumut tulliusoq, maannamullu pisortaagallartoq, Anne Nivíka Grødem, ukioq manna aggustip aallaqqaataani Visit Greenlandimi pisortanngussaaq. Anne Nivíka Sermersooq Businessimi pisortap tulliatut atorfimmeerpoq, inuussutissarsiutit aammalu tikitassat ineriartortinnerinik suliaqarnermik ingerlatsiffigisaminit. Anne Ilulissani inunngorpoq tassanilu alliartorluni, nunatsinnilu suliniutinik aallartitsisarnernik sulianillu aqutsinermik aamma misilittagaqarluarluni.
Anne Nivíka Grødem.
Photo by Magnus Biilmann Trolle
”Visit Greenland nunarsuarmi piumasaqaatit annertusiartuinnartut piumaneqaraluttuinnartullu tunngavigalugit takornariaqarnerup patajaatsuunissaanik qulakkeerinissamut pingaarutilimmik suliassaqarpoq. Taamaattumik takornariaqarnerup nunaqavissunit aallaaveqarluni piginnitseqarlunilu siuarsarneqarnissaa siulersuisut kissaatigaat”, Visit Greenlandimi siulersuisunut siulittaasoq Anette Grønkjær Lings oqarpoq, nangillunilu:
”Nunatta ornitassatut aammalu tikitassaqqissutut nunani tamalaani nittarsaannerata saniatigut, nunap immikkoortuini DMO-t takornariaqarnermut tunngasunik suleqatiginissaannik aallussinissaq Visit Greenlandip pingaartitaraa, nunap ataqatigiissumik aammalu takornariaqarnerup nunatsinnut tamakkiisumik iluaqutaanissaa siunertaralugu. Anne Nivíka suliassamut tassunga paasinnilluartuuvoq, nunap immikkoortuinik sullissineq ilisimasaqarfigilluaramiuk. Nunatsinnimi takornariaqarnerup piujuartitsitsinissamik tunngaveqarluni ineriartortinnerani tamanna pinngitsoorneqarsinnaanngilaq”, Anette Grønkjær Lings naggasiivoq.
Anne Nivíkallu pisortatut nutaatut Visit Greenlandip 2021-miit 2024-ip periusissiaa ”Takornariaqarnerulernissamik siunertaq” siuttuuffigilissavaa, takornariaqarneq nunaqavissunit peqataaffiginneqarlunilu piginneqataaffiusoq aallutissallugu.
”Nunatsinni attaveqaasersuinermi allanngoriartorneq, takornariaqarnerup ineriartortinnissaanut periarfissiilluartoq, piffissami matumani inuiaqatigiittut aqqusaarparput. Ineriartornerullu tamakkiisumik inuiaqatigiinnullu naleqartitanik ineriartortitsisoq uannut pingaaruteqarpoq. Takornariammi avataaniit isiginnaartuuinnaratik nunatsinni ulluinnarni inuunermut piffissami sivikitsumi akuunissaq misigerusuttarpaat”, Anne Nivíka Grødem oqaluttuarpoq, nangillunilu:
”Nunarput nunagiuminartuullunilu tikeraagassaqqissuussaaq. Uangalu nunatsinni takornariaqarnermik ingerlatsisutut tikitassat piujuartitsineq tunngavigalugu ineriartortinneqarnissaat, nittarsaassinittalu takornariartussat taamatut naleqartitsisut siunnerfigissagai pingaartippara. Tamaasilluta takornariaqarnerup nunarput tamakkerlugu iluaqusiinissaa qulakkiissavarput” Anne Nivíka Grødem naggasiivoq.
Anne Nivíka Grødem
Mobil +299 560282
nivika@visitgreenland.com
LinkedIn: Anne Nivíka Grødem | LinkedIn
Formand Anette Grønkjær Lings
Mobil +299 528616
anette@hotelsisimiut.gl
Continues further down the page...
