Tusagassiutinut nalunaarut
Nuuk, 5. februar 2021
Kommuneqarfik Sermersooq, Air Greenland, Greenland Holding aamma Sikuki aningaasaleeqataanermikkut Visit Greenlandi nittarsaanissamut suliniummut tunngatillugu suleqasiuppaat. Suliniut nunani tamalaani nittarsaaneq (branding), ukiuni tulliuttuni ingerlanneqassaaq, Kalaallit Nunaat nunarsuup isaani misigisassarsiorfittut ornigarneqarfissatut ilisarnaasernissaa anguniarlugu.
”Kalaallit Nunaanni takornariaqarnerup ineriartortinnissaanut soqutigisalinnik sisamanik suleqatissarsisimanerput nunnaarutigalugulu tulluusimaarutigaarput. Ukioq 2020 takornariaqarnermut sakkortusimavoq, Visit Greenlandilli siunissaq pitsaasutut, takornarianullu nunatsinnut kusanaqisumut pilerilersitsinissamut periarfissaqarluartutut takorloorpaa. Neriuutigaarput suliffeqarfiit kommunellu amerlanerusut suliniummut peqataalerumaartut”, Visit Greenlandimi pisortaaneq Julie Pars oqarpoq.
Suliniutip ingerlanneqarnera suli aallarniummi inissisimavoq, taamaattorli 2022-mi Nuummi, Ilulissani Qaqortumilu anginerusunik mittarfittaarnissaq sioqqullugu saqqummiunneqassaaq. Suliniutip siunertaraa misigisassarsiorlutik takornariat Kalaallit Nunaannut kajumilersinnissaat, taakkuuppummi nunamut aningaasanik isertitsilluartartut kiisalu pinngortitamut piorsarsimassutsimullu ataqqinnittut.
Kommuneqarfik Sermersuumi Kommunep pisortaa Lars Møller-Sørensen isumaqarpoq atlantiku qulaallugu kommunemut timmisartuussisarnissat nutaat takornarianik amerlanerusunik tikittoqartalernissaanut tunngaviusut, taamaattumillu nittarsaanermik suliniut pingaarutilimmik inissisimasoq:
“Kommuneqarfik Sermersuumi piujuartitsilluni takornariaqarneq suliniutigereerparput, taamaattumik soqutigisatsinnut ilaalluinnarpoq takornariat taama ittut – kommunetsinnut ineriartortitsisumik nalilimmillu pilersitsisut – amerlanerusut kajumilersinnissaat. Taamaattumik Visit Greenlandip suliniummi suleqatiginissaa toqqarsimavarput.”
Air Greenlandimi pisortaaneq Jacob Nitter Sørensen ima oqaaseqarpoq:
”Air Greenland nittarsaanissamik suliniummi peqataanissaminut qilanaarpoq. Suliniummi Kalaallit Nunaannut mittarfissat nutaat aqqutigalugit angalasussat naammatsinnissaannut isumannaarisussaammat. Timmisartortitseqatigiiffiuvugut ukiuni amerlasuuni angusaqarluartumik Visit Greenlandimi suleqateqareersimasut. Kalaallimmi Nunaata saqqumilaarnissaa anguniarlugu suleqatigiinnissamik isumaqatigiissuteqareerpugut”, Air Greenlandip pisortaanera Jacob Nitter Sørensen oqarpoq.
Bureaup nalunnginneqarluartup &Co-p Visit Greenland suleqatigalugu suliniut sanaartussavaat, suliniullu nunani tamalaani nutaarsiassaqarfinni inunnullu attaveqaatini malunnartinneqassaaq.
”Greenland Holding, namminersortut akornanni siuarsaanermik annertuumik suliniuteqartoq isumaqarpoq takornariat Kalaallit Nunaannut tikittartut amerlanerusut aallarnisaasunut suliffeqarfinnullu aningaasatigut iluaqutaajumaartut, pingaartumik angallassisunut, akunnittarfinnut, neriniartarfinnut kiisalu allatigut takornariaqarnermik inuussutissarsiortunut.
”Greenland Holding isumaqarpoq Kalaallit Nunaanni suliffeqarfinnik suleqateqarneq pissusissamisoortuusoq, inuussutissarsiortunullu siuarsaassasoq, tamannami Kalaallit Nunaanni ilippanarluartunut ilaavoq,” Greenland Holdingimi pisortaaneq Karsten Høy oqarpoq.
Sikuki Nuuk Harbour takornariaqarnerup aallartisaqqinnissaanut suleqataanissaminut qilanaarpoq:
”Kalaallit Nunaata misigisassarsiorfittut nittarsaannissaanut suliniummi peqataanissarput qilanaaraarput. Takornariaqarnerup aallartisaqqinnissaa pingaaruteqarpoq Kalaallillu Nunaat misigisassarsiorfittut nittarsaannissaa sunniivigeqatigiinnermik pilersitsissaaq, pingaartumik aallarnisaasunut, akunnittarfinnut, takornarialerisunut, timmisartortitseqatigiinnut talittarfinnullu,“ John Rasmussen, Sikuki Nuuk Harbourimi pisortaq oqarpoq.
Visit Greenlandip Idrissia Thestrup, senior manager, nittarsaanissamut suliniummi aqutsisutut toqqarsimavaa. Aqutsisup sunniivigeqatigiinnerup siammasissup nittarsaanissamullu suliniutip pisussaaffittut tiguneqarnissaata isumannaarnissaa akisussaaffigaa. Suliniut maanna sisamanik suleqataaffigineqarpoq – saniatigut Visit Greenlandi – tunniusseqataasutut.
Paasissutissat annerusut:
Visit Greenlandimi pisortaaneq, Julia Pars: +299 553691
Continues further down the page...