Visit Greenlandip aasaq manna sulisunik pikkorissunik pingasunik suleqatitaarnini suleqatitaartussanngorninilu nuannaarutigalugu matumuuna nalunaarutigaa. Sulilersut sulilersussarlu nunatta misigisassarsiorluni takornariarfiusartutut ilisimaneqartutut nittarsaanneqarnissaanik pilerisaarutigineqarnissaanillu pingaartitsilluni takornariaqarnerup imminut nappassinnaasumik ineriartortinneqarneranut nukittorsaataassapput.
Mirjam Johannesen (talerp.) juunip aallaqqaataani TravelTradetut PR Manageritullu atorfinippoq. Ukiut qulingiluat sinnerlugit angalatitsivinni sulinermik misilittagaqarpoq, Greenland Travelimilu suleqatigiinni aqutsisuusimanermigut suliaqarfigisassani pillugu ilisimasaqaqaluni. Mirjam nunat tamalaat akornanni niueqatigiinnerup pilerisaarinerullu iluani akademimerkonomimut ilinniarsimasuuvoq.
Laali Berthelsen (qeqq.) attaveqaqatigiinnermi siunnersortitut piffissap ilaani sulisartussatut juunip aallaqqaataa aallarnerfigalugu atorfinippoq. Laali takornarialerinermi ilaatigut takornarianik angallassilluni nassuiaassisartutut, angalaneq pillugu ullorsiutitut ittunik isiginnaagassiortartutut tusagassiorfinnullu attaveqarnermi ataqatigiissaarisutut misilittagaqarpoq. Tamakkuninnga assigiinngitsunik tunuliaqutaqarnermigut attaqaqatigiinnermut nunattalu takornariarfissatut tusagassiarineqartarnissaanut immikkorluinnaq ittunik piginnaaneqarpoq.
Lennart Olsen aggustip aallaqqaataa aallarnerfigalugu TravelTradetut Marketing Manageritullu atorfinissaaq. Lennart pilerisaarineq pillugu Aarhus Business Academymi ilinniarsimasuuvoq, ukiunilu arlalinni pilerisaarinermik, attaveqaqatigiinnermik sulianillu aqutsinermik misilittagaqarluni. Katuami Pisiffimmilu sulisimanermigut attaveqaqatigiinnermi pilerisaarinermilu pisariaqaqisunik misilittagaqarpoq.
Laali, Mirjam Lennartilu ilisimasaqarnermikkut tunniusimanermikkullu nunatsinni takornariaqarnerup imminut nappassinnaasumik ineriartortinneqarnissaanik anguniagaqarnitsinnut nukittorsaataasussat tikilluaqqungaarpavut. Taakkua atorfinitsinneqarnerisigut suliffeqarfittut nukittunerulernissarput aammalu suleqatigisatsinnut soqutiginnittunullu assigiinngisitaarnerusunik piginnaassuseqarluta pitsaasumik sullissinissarput naatsorsuutigaarput.
Continues further down the page...
