Periarfissallu nutaat atorluarusullugit Visit Greenland aamma NALIK Ventures ataatsimoorlutik tapiissuteqarnissamut aaqqissuussamik atulersitsipput, taamaalilluni periusissiornikkut aaqqissuussanut pingaarutilinnut marlunnut Amerika avannarliup niuerfiani pisussat ukuusunut: Adventure Elevate North America 2025 aamma US Roadshow 2025 Nunatsinni takornarialerisut peqataanissaminnut ikiorserneqarsinnaalerput.
Kalaallit Nunaat takornariaqarnikkut ornitassatut nittarsaanissaanut aammalu Amerikami angalatitsiviit takornariartitsisartunut pingaarutilimmik attaveqaqateqalernissamik pilersitsiviusumik, aaqqissuussat taakku marluk kalaallinut takornariartitsisartunut periarfissiissapput. Peqataaneq nunatsinni takornarialerisut piginnaasaannik nukittorsaaffiullunilu suliffeqarfittut periarfissanik nutaanik ammaassiviusussaq, niuerfinnik paasisimasaqalersitsilluni, attaveqaqateqalersitsiffiulluni aammattaarlu misilittakkanik paarlaasseqatigiiffiussalluni.
Pisussani taakkunani marlunni, nunatsinniit suliffeqarfiit minnerpaamik 10 peqataanissaat naatsorsuutigineqarpoq – pisussanilu taakkunani nunatsinni takornarialerisut aammalu nunat tamalaani suleqatigisartakkat akornanni attaveqaqatigiilernissaq periarfissaalluarumaarluni.
Ataatsimut aallartitatut nunat tamalaat akornanni Kalaallit Nunaannik nittarsaaginnaratik, piginnaasatigut ineriartortitsivimmut isummanillu siammarterivimmut pingaarutilimmut appakaatissapput.
“Kalaallit Nunaata Amerikap avannarliup niueqatigiiffianiinnera aatsaat taamak pingaaruteqartigaaq. Nunatsinniit takornarialerisut suliffeqarfiinit aallartitat katersornerisigut, nunatta takussaanera nukittorsarsinnaavarput, aammalu nunatta soqutigineqarnera timitalerneqarnissaa qulakkeerneqarsinnaalluni”, Anne Nivíka Grødem, Visit Greenlandimi pisortaq oqarpoq.
Visit Greenland aamma NALIK Ventures matumani suleqatigiinnerminni tapiissuteqarnikkut aaqqiissummik, Amerika avannarlermi niueqatigiiffimmi periusissiornikkut aaqqissuussassani pingaarutilinni, Kalaallit takornarialerisut peqataanissaannut aningaasatigut ikiuussinnaanermik neqerooruteqarput. Tapiissutit suliffeqarfinnut angallassinermik, inniminniisarfiliutillik (booking), angalatitsivinnut, unnuisarfinnilluunniit ingerlatsisunut neqeroorutaavoq, Kalaallillu Nunaata nunat tamalaat akornanni nittarsaanneqarnerata nukittorsarnissaanut attaveqaqateqalersitsinissamullu tapertaassallutik.
“Kalaallit Nunaanni takornarialerisut siuariartornissamut ineriartornissamullu nukittorsaatissatut niuerfinnut attaveqaatinullu appakaanniarneranni ikorfartueqataanissarput, nuna tamakkerlugu inuussutissarsiuteqarnikkut inerisaanermi ingerlatseqatigiiffittut akisussaaffeqarsoraraaput. Takornariaqarneq nunatsinni aningaasaqarnermut pingaarutilittut ingerlatitseqataaffiuvoq, nunallu tamalaat akornanni piujuartitsiffiunerulernissamut unammillersinnaassuseqarnerulernissamullu una suleqatigiinneq alloriarneruvoq,” Thomas ‘Tyt’ Mogensen NALIK Venturesimeersoq oqarpoq.
Suliffeqarfiit Nuummi inissisimaffillit 10.000 DKK tungaanut qinnuteqarsinnaapput, suliffeqarfiilli Nuup avataani inissisimasut 20.000 DKK tungaanut tapiissutisisinnaallutik. Tapiissutit siullernut tunniunneqassapput.
US Roadshow-imut qinnuteqarneq kingusinnerusukkut ammassaaq.
Continues further down the page...
