Islandimioq Hjörtur Smarason 1. april Visit Greenlandimi pisortanngussaaq. Julia Pars ukiut pingasut pisortaareerluni februarip naanerani soraartussaq taarsissavaa.
Hjörtur Smarason Copenhagen Business Schoolimi cand.merc.-itut ilinniagaqarpoq ukiorpassuarnilu misilittagaqarfigalugit branding aamma attaveqaqatigiinneq. Siusinnerusukkut suliarisimasaanut ilaapput Issittumi, Asiemi Afrikamilu attaveqaqatigiinnikkut periusissiorneq, takornariaqarnikkut inerisaaneq kiisalu ajornartorsiortoqartillugu aqutsineq.
”Pisortaajunnaalersup Julia Parsip Visit Greenland patajaatsumik periusissioreerlugu tullissaminut tunniutissavaa. Periusissiami piujuartitsineq pingaartillugu ukkatarisimavaa” taamak oqarpoq Visit Greenladimi siulersuisut siulittaasuat Anette Grønkjær Lings, nangillunilu:
”Visit Greenlandip ulluni makkunani marlunnik immikkut pingaarutilinnik suliassaqarpoq; takornariaqarnerup aallarteqqinnissaa, tassanilu niuerfiit qaninnerpaat ukkatarineqarput kiisalu pilersaarut annertooq nunatta immikkut avammut nittarsaanneqarnissaanik tunaartaqartoq (branding), taannalu nunatsinni angallannikkut periarfissat nutaat pilersinneqartussani kivitseqataasussaavoq. Pisortamik nutaamik ujaasinitsinni immikkut salliutissimavarput pisortap nutaap branding aamma takornariaqarnermik aallartisaanermik misilittagaqartuunissaa. Visit Greenlandimi sulisut suliaminnut immikkut ilisimasaqarlutillu tunniusimalluinnartuupput, tamannalu pingaaruteqarluinnarpoq, Hjörturimi immikkut ilisimasalinnik aqutsinissaminut ilisimasaqarluarmat” taamak oqarpoq Anette Grønkjær Lings.
Pisortartaatut Hjörtur Smarasonip Visit Greenlandip 2021-2024’mut periusissiaa “Takornariaqarneruleriartornerup orninnera” siuttuuffigissavaa, tassani nunatsinni takornariaqarnerulernissaa ataavartumillu ineriartornissaa anguniassallugu, soorlu aamma nunarput adventure siunertaralugu ornitassaqilluinnartunngortinnissaa. Immikkulli ataaseq pisortassanngortussap pingaartilluinnarpaa:
”Kalaallit Nunaanni takornariaqarneq mittarfiit nutaat periarfissanik nutaarluinnarnik pilersitsisussat peqqutigalugit piffissamut pissanganartorujussuarmut ingerlavoq. Piffissami pilersitassat aningaasaliiffiusussat tunisassianillu nutaaliornerit suliffissanik pissanganartunik Kalaallit Nunaanni pilersinneqassapput. Kalallit nunaanni takornarialerisut naapinnissaannut ineriartornermullu peqataanissannut assut qilanaarpunga. Kisianni siulliutitassarivara periusissiornissaq, tassani takornarialerinermi suliffeqarfiit coronap ajornartorsiortitsinera qaangiuteriarpat ingerlaqqinnissaannut iluaqutissaannik” taamak oqarpoq Hjörtur Smarason.
Julia Parsip pisortatut soraarnerata Hjörtur Smarasonillu pisortanngornissaata tungaanut pisortap tullersortaa Mads-Daniel Skifte pisortaagallassaaq.
Paasisaqarnerorusukkuit uku saaffigikkit:
Hjörtur Smarason
Mobil +45 22801416
hjortur@visitgreenland.com
Formand Anette Grønkjær Lings
Mobil 528616
anette@hotelsisimiut.gl
Continues further down the page...