Visit Greenlandip ukioq pisoqarfiungaatsiartussaq iserfigaa, Kalaallimmi Nunaat ukioq manna Vestnorden Travel Martimi aaqqissuisuuvoq – Takornariaqarnerup iluani angalanermut saqqummersitsineq, nunarsuaq tamakkerlugu ornigarneqartartoq. Saniatigut suliffeqarfiup pilerisaarinermut suliniut nutaaq aallartisarpaa, Kalaallit Nunaannut soqutiginnissutsimik saqqumilaarnermillu pilersitsisussaq – maannakkut niuerfioreersunut niuerfissanullu nutaanut. Visit Greenlandi saniatigut Kalaallit Nunaanni takornariaqarnermi piujuartitsisumik ineriartortitseqataanissamik suliniuteqarpoq. Tamanna anguneqassaaq suleqatigiinnernik akimortunik tapersiinikkut, kiisalu Kalaallit Nunaanni inuiaqatigiinnut iluaqutaasumik takornariaqarnermi ineriartortitsinerup qulakkeerneratigut.
Ineriartortitsinerup tassunga ingerlaarnissaa anguniarlugu, aqutsinermi nukiit eqqortumik atorneqarnissaat siulersuisunit aalajangerneqarsimavoq. Ajoraluartumik siulersuisut tatigisimanngilaat, maannakkut aqutsinermi ukkatarisat eqqortumiissimanerat. Taamaattumik Anne Nivíka Grødem pisortaagallartutut atorfinitsinneqarpoq, sulinerlu eqqortumik ukkatarinnittoq, eqqortumillu takorluugalik aallartinneqarpoq.
Anne Nivíka Grødem.
Photo by Magnus Biilmann Trolle
”Taamatut inissisimaneq pitsaanerpaamiinngisaannarpoq, kisianni siulersuisutut akisussaaffigaarput ukkatarinninnerup eqqortup qulakkeernissaa”, siulersuisuni siulittaasoq Annette Lings oqarpoq nangillunilu. ”Toqqissisimaffigaara Visit Greenlandimi sulisut Anne Nivíka suleqatigalugu sulinerup ingerlaqqinnissaanut tunngaviliilluarnissaat, Kalaallillu Nunaanni takornariaqarnerup pitsaanerpaamik sinaakkusernissaanut ineriartortitseqataanissaat.”
Anne Nivíka Grødem Visit Greenlandimi pisortaagallartutut atorfinitsinneqarnermini Sermersooq Businessimi pisortap tulliatut atorfimminiit sulinngiffeqarallassaaq. Tassani ukiorpaalunni inuussutissarsiornermi siuarsaanermik suliaqartarsimavoq, pingaartumik inuussutissaqarnermut takornariaqarnermullu atatillugu. Anne Nivíka aamma ukiorpassuarni aallarnisaasutut, suliniutini aqutsisutut nutaanillu ineriartortitsisutut misilittagaqarsimavoq.
Ilulissani inunngorsimavoq peroriartorlunilu, 2005-miillu Nuummi najugaqarsimalluni. Katissimavoq pingasunillu meeraqarluni.
LinkedIn: Anne Nivíka Grødem | LinkedIn
Paasisaqarnerorusukkuit Visit Greenlandimi siulersuisuni siulittaasoq attavigisinnaavat, Anette Grønkjær Lings oq. 527616 / mail: anette@hotelsisimiut.gl
Continues further down the page...
