Nunatta takornariaqarnermut siunnersuinermik ingerlatsivia suliassanik naammassinnikkasuartarnerup tamatumalu sunniutigisartagaasa pitsanngorsarnissaannik kissaateqarneq tunngavigalugu suliffiutigisani tamaasa Kalaallit Nunaannut nuunniarpai. Aaqqissuussaanerlu nutaaq nunatsinni takornarianit tikinneqartartunut piareersarnissamut pitsanngorsaanermut aamma nukittorsaataassaaq.
2024-mi timmisartunut nunanut tamalaaneersunut mittarfissuit piareertussaapput, nunatsinnullu takornariarnissamik kissaateqartut tutsiuttalereerput. Nunatsinnik nittarsaassineq nunattalu takornariagassatut ilisaritinneqarnissaa Visit Greenlandip qitiusumik suliassaanut ilaavoq.
Suliffiit nunatsinnut nuunneqarneri, nunani avannarlerni aammalu Amerikap avannaani aallunneqarnerusut akornanni, nunatta inissisimaneranik atuilluarnermut ilasaataassaaq. Piginnaasaqarluartut nunatsinnut inissinnerisigut, suliffeqarfik ullup qeqqata tungaanut nunani avannarlerni suliffeqarfinnik sullisseriarluni ualikkut Amerikap avannaaneersunik sullissinissamut periarfissaqalissaaq.
”Suliffeqarfiup ataatsimoortilernissaa piffissanngorpoq, taamaasilluta piginnaasalinnik nunatsinni ineriartortitsissagatta. Periusissiarput qitiusumillu suliassagut allanngunngillat, siunissamili takornariarfissani ineriartortitsineq annertusassavarput, takornarialerisut aammalu immikkoortortani takornariaqarnermut inuussutissarsiornermullu siunnersuisut suleqatigalugit” Visit Greenlandimi pisortaq Anne Nivíka Grødem oqarpoq.
Takornariarfiusinnaasunik ineriartortitsinerup sammineruneqalernera piffinni assigiinngitsuni pisariaqartitsineq periarfissallu naapertorlugit pissaaq, taamaasilluni takornariaqarneq nunatsinnut tamarmut iluaqutaalissammat. Tamannalu Visit Greenlandip qitiusumik suliassaanut ilaareerpoq, tassa ilaatigut nunatsinni takornarianit tikinneqartartuni misigisassarsiornikkut, attaveqaasersuutitigut aammalu unnuiffissaqarnikkut ingerlatsinerup ineriartortinneqarnerata pitsanngorsarnissaa.
Suliassat pingaarnerit aallaavigalugit piffissami kingullermi suliffeqarfiup ilusilersugaanikkut sulisoqarnikkullu pitsaanerpaamik ingerlalernissaa Visit Greenlandip ilungersuutigaa. Ilaatigut makku tunngavigalugit, suliffeqarfiup iluani avataanilu misissueqqissaarnerit, Visit Greenlandip periusissiaani anguniagassatut siunniussat, suliffeqarfimmi taassumalu avataani oqaloqateqartarnerit, suliffeqarfiullu nunatsinni inissisimanissaanik kissaateqarneq, suliffeqarfimmi siulersuisut suliffeqarfiup aaqqissuussaanerata allanngortinneqarnissaa aalajangerpaat.
”Silarsuaq allanngoriartorfiuvoq. Nunatsinni takornariaqarneq aamma taamaappoq. Nunatsinnilu takornariaqarnermut siunnersuisarfittut malinnaanissarput pissusissamisoorpoq, taamaasilluta nunatsinni takornariaqarnerup tamakkiisumik naleqarnerulerneranut peqataassagatta. Suliffeqarfiup aaqqissuussaanerata allanngortinneratigut aammalu nunatsinni angerlarsimaffeqalerneratigut, soqutigisaqaqatigiit suleqatigisatta kissaataat, taamatuttaaq siunissami suliassat sammisassatullu siunniussat piviusunngortissavavut” siulersuisunut siulittaasoq Anette Lings oqarpoq.
Aasap ingerlanerani soqutigisaqaqatigiit pingaartumilllu suleqatigisat akornanni apeqqutit akisassat atorlugit paasiniaasoqarpoq. Paasiniaanerullu ilaatigut takutippaa soqutigisaqaqatigiinni itinerusumik oqaloqatigiittarneq atorlugu attaveqatigiinnerunissaq kissaataasoq, aammalu suliffeqarfiup suliniutaasa nunatsinniit aallaaveqarnerat ersarinnerusariaqartoq.
Suliffeqarfiup nutaamik aaqqissuussanera qaammatini tulliuttuni atuutilersikkiartuaassaaq, Visit Greenlandillu allaffia Københavnimiittoq 2023-mi februaarip naanerata tungaanut ammassaaq.
CEO, Visit Greenland, Anne Nivíka Grødem, mobil 56 02 82, nivika@visitgreenland.com
Continues further down the page...
