Nunaqavissunut takornarialerineq ajornannginnerulersinniarlugu pingaartinneqarnerulersinniarlugulu, 2024-ip ingerlanerani Visit Greenland suliniutinik tigussaasunik arlalinnik aallartitsinikuuvoq. Ilaatigut isorliunerusuni pikkorissaasoqarnikuuvoq, illoqarfinni takornariakulaneqarnerusuni qanoq amerlatigisunik sullissisinnaaneq misissoqqissaarneqarnikuuvoq, paasissutissiilluni ataatsimiisitsisoqartarnikuuvoq aammalu nunap immikkoortuini takornariaqarnikkut ingerlatsiviit suleqatigineqartarnikuullutik. Ataatsimut isiginninneq siammasissumillu suleqateqarneq ukiumi tassani malunnarnerpaasimasut pisortaq Anne Nivíka Grødem ersarissaavoq:
“Takornariaqarneq immini anguniagaanngilaq – nunarpulliuna tamakkerlugu ineriartortitsilernissamut periarfissiinissamullu aqqutissaq. Taamaammat suliatta nunaqavissunut siunertarissaartuunissaat aammalu inunnik avatangiisinillu ataqqinnissuseqartumik ingerlanneqarnissaat qulakkeerneqartussaavoq. Ilisimasaqarnissaq, suleqatigiinnissaq sammivillu ataatsimoorussassaq pisariaqartinneqarput.”
Ukioq aamma aaqqissuussaanikkut annertuumik allannguiffiusimavoq. Nunatsinnilu takornariartitsisarneq pillugu inatsit siullerpaaq akuerineqarpoq, ukiunullu qulinut pilersaarusiaq aallartinneqarluni. Ilutigitillugu Nuummi nunat tamalaat akornanni mittarfissuassaq nutaaq ammarneqarpoq, periarfissanillu nutaanik pilersitsilluni – kisianni aamma pilersaarusiornerulernissaq ataqatigiissaarinerulernissarlu pisariaqartinneqalerput. Umiarsuarnik takornariartaatilerinikkut aaqqiissut nutaaq digitaliusoq atulerpoq, Cruise Forummertoqarmallu umiarsuarnik takornariartaatilerineq qanoq pitsaanerusumik isumagineqarsinnaanersoq qanorlu nunaqavissunik peqataatitsinerusoqarsinnaanersoq peqataasut nuna tamakkerlugu 100-ngajaat oqallisigaat.
2024-ip upernaavani inuiaqatigiit aningaasaqarniarnerannik misissueqqissaarneq saqqummiunneqarmat, 2023-imi nunatsinni aningaasaqarnermut 1,9 milliardit koruunit takornarissanit avataaneersuneersuusut isertinneqarsimasut suliffissallu 1.000-it sinnerlugit pilersinneqarsimasut takutinneqarpoq. Takornariaqarnerup pingaaruteqalereersimanera kisitsisit uppernarsarpaat, ineriartornerlu silatusaartumik aqunneqarpat – aamma suli annertunerusumik isaatitsivigineqarsinnaasoq.
Nunat tamalaat akornanni Nunarput soqutigineqarnerulernikuuvoq – ilaatigut National Geographic aamma Travel + Leisuremit eqqartorneqartarnini, aammalu Visit Greenlandip isiginnaagassiaata Greenland’s Authentic Intelligence-ip nunat tamalaat akornanni filmfestivalertoqarnerani takuteqqaarneqarnera pissutigalugit. Suliniut Nunarput Nuan innuttaasunit peqataatitsinerulernissaq ilanngussuuffigineqalernissaalu, aammalu takornariaqarneq qanoq isumaqartoq – Kalaallillu Nunaannut qanoq sunniuteqarsinnaanera pillugu ilisimasaqarnerulersitsinissaq siunertaralugu ukiakkut saqqummiunneqarpoq.
Visit Greenlandip siulersuisuini siulittaasup, Anette G. Lingsip, ukiumi tassani ataqatigiissitsineq siuariartornerlu malunnarnerpaasimasutut ersarissaatigai:
“Pilersaarusiorfimmi sukkasuumik ineriartortumi, ataqatigiissaarinissaq ataatsimullu isiginnilernissaq ukiuni kingullerni pisariaqartinneqalersimasut ersarippoq. Visit Greenland ilisimasanik tapersiissuteqarsimavoq, aammalu takornarissanik nunallu immikkoortuinik akimortumik inissisimasunik ataqatigiissitsisuulluni, atuuffillu taanna pingaaruteqartuuvoq. Takornariaqarneq alliartuinnartillugu sinaakkutit paasinnittaaserlu ataatsimoorunneqartut aalajangiisuulluinnartunngorsinnaapput – ineriartorneq akisussaassuseqartumik ingerlanneqassappat aammalu nunap tamakkerluni iluanaarutit iluaqutiginiassappagit.”
Visit Greenlandip aningaasaqarnera qiviassagaanni, 2024-imi 104 t.koruuninik sinneqartooruteqarsimavoq, tamannalu ingerlatseqatigiiffiup siunertaa eqqarsaatigalugu siulersuisut naammagisimaarpaat. Aningaasaqarnikkut angusat periusissiornikkullu sammiviup uppernarsarpaa, aningaasaliissutinik pitsaasumik atuinissamut piffissarlu ungasinnerusoq eqqarsaatigalugu piujuartitsinermik ukkassinissamut Visit Greenland pisussaaffeqartoq.
Ataatsimeersuarnermi Anette Lings, Hotel Sisimiuni pisortaq, siulersuisuni siulittaasutut qinigaaqqippoq. Taamatuttaaq siulersuisuni ilaasortatut qinigaaqqillutik Gerth P. Olsen, Kattie Nielsen, Heidi Jensen aamma Erik Palo Jacobsen. Kingorna siulersuisut ataatsimeersuarneranni Gerth P. Olsen siulittaasup tulliatut qinigaaqqilluni.
Continues further down the page...
