Visit Greenlandimi siulersuisut pisortamut Anne Nivíka Grødemimut isumaqatigiissut piffissamut nutaamut ukiunik pingasunik sivisussusilimmut sivitsoqqammerpaat. Takornariartitsinerup inuiaqatigiinni kalaallini inissisimaneranik naleqassusianillu nukittorsaanissaq ukkataralugu periusissiap nutaap atuuffigisaani aaqqissuussaanerup ingerlatsisussanngornerani aqutsisuni atajuartitsinissaq sivitsuisoqarneratigut qulakkeerneqassaaq.
Siulersuisunut siulittaasup Anette Lingsip tamatumunnga atatillugu erseqqissarpaa Anne Nivíka Grødem 2022-mi ivertinneqarnerminiilli aaqqissuussaanerup ineriartortinneqarnerani ataatsimoortitsillunilu siuttuusimammat. Kalaallit Nunaata angalaffissatut akisussaassuseqartutut pilerinartutullu inissisimalernissaa – nunami namminermi aamma nunani tamalaani – siunnerfilimmik sulissutigisimavaa, aammalu kalaallit naleqartitaat ataqqillugit inuiaqatigiillu siunissaq ungasinnerusoq eqqarsaatigalugu ineriartortinneqarnerinut iluaqutaasussamik takornariartitsisarnerup qanoq ineriartortinneqarsinnaaneranut annertuumik paasisimasaqarnini takutissimallugu.
Siulersuisut isumaqatigiissummik sivitsuinermikkut kissaatigaat Kalaallit Nunaanni takornariartitsisarnerup annertuumik ineriartorfiunerani soqutigineqarnerulerneranilu Visit Greenlandip periusissiatigut anguniagaata piviusunngortinnissaannut aqutsisoqarnikkut tunngavissaq pisariaqartoq qulakkiissallugu. Anette Lingsip erseqqissaatigaa aaqqissuussaanerup ukiunut qulinut periusissiaata nutaap maajimi tamanut saqqummiunneqartup ilusilersorneqarnera Anne Nivíkap qitiusumik suleqataaffigisimammagu aammalu siulersuisut, aaqqissuussaaneq nunalu tamakkerlugu suliaqartut qanimut suleqatigalugit suliap ingerlateqqinnissaanut nukittuumik inissisimanera siulersuisunit annertuumik tatigineqarmat.
Pisortap suliap kivinnissaata ingerlateqqinnissaanut piareersimalluni oqaatigaa periusissiatigullu anguniakkat nutaat inuiaqatigiinni kalaallini siunissaq ungasinnerusoq eqqarsaatigalugu naleqalersitsisussanngortinnissaat qilanaaralugu: “Siulersuisunit tatiginninnermik takutitsivigineqarnera qujamasuutigaara, aaqqissuussaanerullu taama tunniusimatigisup suliatigullu pikkorissuseqartigisup siuttuuffiginera tulluusimaarutigalugu. Nunatsinni takornariartitsineq periarfissarpassuaqarpoq, kalaallillu naleqartitaasa isumaliutigilluarnerisigut aallaaviginerisigullu takornariartitsinerup nunamut tamarmut iluaqutigineqartussanngorlugu ineriartortinnissaanut pitsaasunik periarfissaqarpugut. Tamannalu innuttaasut, inuussutissarsiortut oqartussallu oqaloqatiginissaannik suleqatiginissaannillu pisariaqartitsivoq – suliallu taassuma ingerlateqqinnissaa qilanaareqaara,” Anne Nivíka Grødem taama oqarpoq.
Continues further down the page...
