Ukioq naajartulerpoq, periarfissarlu manna iluatsillugu takornariaqarnermik suliaqarfimmeersut tamaasa, nuna tamakkerlugu takornariaqarnermi siunnersuisoqarfimmit Visit Greenlandimit, juullisiorluarnissaannik ukiumullu nutaamut iserluarnissaannik kissaappagut.
Ukioq qaangiuttoq
Ukioq 2025 Nunatsinni takornariaqarnikkut pisoqarfiulluarpoq, tikeraartorpassuarnik tikilluaqqusilluta, nunatsinni takornariaqarnermut nutaamik inatsiseqalerluta attaveqaasersuutillu nutaat angalariaatsillu nutaat atorlugit siunnerfilimmik suliaqalerpugut. Pisut taakku tamarmik takornariaqarnikkut ineriartortitsinermut sinaakkutissanik nutaanik pilersitsipput – ilissinnullu ullut tamaasa takornariaqarnermik suliaqartunut annertuunik piumasaqaateqartitsipput.
Takornariaqarnikkut inuussutissarsiuteqartut akornassinni misissuinerup nutaap, Visit Greenlandimit ingerlanneqaqqammersup, erseqqilluinnartumik takutippaa ukioq 2025 ulapinnarlunilu ilungersorfiusimasoq. Pingaarnertut oqaluttuaraarsi tikeraat amerlanerusimasut, suleqatigiinnerit nutaat pilersimasut nunattalu soqutigineqarnera malunnaatilimmik annertusiartortoq. Tamatumunngalu peqatigitillugu tikeraarnerit sivisunerusut, najukkani inuiaqatigiit qaninnerusumik naapittarnissaat aammalu pinngortitatta piorsarsimassutsittalu itinerusumik paasisaqarfiginissaat tikeraanit piumaneqartut malugisinnaallugu oqaatigaarsi.
Misissuinerulli aamma takutippaa ukioq qaangiutilersoq unammilligassaqarfiusimasoq. Angalanernik taamaatitsinerit, kinguaattoornerit tikeraallu ullorpassuarni ingerlariaqqissinnaajunnaartarnerat ilissinnut sulisussinnullu annertuumik ilungersortitsipput. Taamaakkaluartoq suliatigut pikkorissuseqarlusi, eqaassuseqarlusi najukkamullu annertuumik ilisimasaqarlusi tikeraat tikilluaqqusinnaasimavasi. Tamatumunngalu qutsavigingaarpatsigit.
Suut ataatsimoorfigisagut tamakkerlugit
Nunarput nunanit tamalaanit ukioq manna immikkut illuinnartumik ukkatarineqarpoq, tikitassatut pilerinartutut aammalu nunatta Issittumi politikkikkut inissisimanerata pingaaruteqassusia pissutigalugu. Uagut nammineq nipitta nunat tamalaat akornanni nukittunerusariaqarnerata pingaaruteqassusianik ersarinnerulersitsivoq, peqatigisaanillu kikkuunerput takornariaqarnermillu qanoq ittumik kissaateqarnerput pillugu nunami namminermi oqaloqatigiinnerput nukittorsarparput.
Taamatut ineriartortoqarnera aamma tamatsinnut naatsorsuutigisanik nutaanik malitseqarpoq. Visit Greenlandimi taakku eqeersimaartumik aallaavigalugit sulivugut. Nittarsaassinikkut periusissiatigut suliniuteqarnitsinni kalaallit nipaata nukittorsarnissaa siunnerfilimmik sulissutigaarput – nunat tamalaat akornanni aammalu nunatsinni.
Periusissiarput nutaaq ukioq manna aamma saqqummersipparput: “Kalaallit Nunaat – suullu ataatsimoorfigisagut tamakkerlugit”. Tassanilu Nunatsinni takornariaqarnerup ataatsimooqatigiinnitsinnut, ulluinnatsinnut silarsuullu sinneranut attaveqarnitsinnut qanoq nukittorsaasinnaanera aallaavigineqarpoq.
Periusissiami takornariaqarneq piujuartitsiffiusoq, najukkani inuiaqatigiinni periarfissanik pilersitsiffiusoq, suliffissanut nutaanut suliffeqarfinnillu aallartisaanermut matunik ammaassisoq, aammalu pinngortitamik, piorsarsimassutsimik ataatsimooqatigiinnermillu ikorfartuisoq ukkatarineqalersippagut. Ataatsimoorluta nunatsinni attaveqartitsivugut Nunarpullu najugaqarfigissallugu pitsaanerulersillugu aammalu tikikkuminartillugu – uagut piumasagut tunngavigalugit suullu ataatsimoorfigisagut tamaasa aallaavigalugit.
Takornariaqarneq peqatigiilluta pilersissavarput
Periusissiarli suliaqarfiit akimorlugit suleqatigiinnikkut aatsaat piviusunngortinneqarsinnaasimavoq: kangerlunni angallassisartut, unnuisarfiutillit, angallatini naalakkat, suliffeqarfeeqqat ilaqutariinnit ingerlanneqartut, cruisenik angalanernillu ataatsimoortunik angalatitseqatigiit aamma pioarsarsimassutsip iluani suliallit pinngortitalerisullu akornanni – ilissi, silarsuarmiut Kalaallit Nunaannik naapitsineranni sallersaasartusi tamassi. Takornariaqarnermi peqatigiilluta pilersittussaavarput. Aamma peqatigiilluta nunanit tamalaanit soqutiginninneq annertusiartortoq attaveqaasersuutillu nutaat akisussaassusilimmik ineriartortitsinermut, sinaakkutissanut pitsaanerusunut nunarpullu tamakkerlugu periarfissanut amerlanerusunut atorsinnaavagut.
Juullimi pilluaritsi ukiumullu nutaamut iserluarisi
Juulli ukiortaarlu qalliartulermata 2025 pillugu qamannga pisumik qujaffigerusuppatsigit. Suliassinnut, suleqatiginissinnut aamma oqaloqatigiittarnitsinni ammasumik pissuseqarnissinnut qujanaq – aammalu tikeraanik ullut tamarluinnaasa tikilluaqqusilluartarnissinnut Kalaallillu Nunaannut silarsuup sinneranut sinniisuulluarnissinnut.
Takornariaqarnermik suliaqarfimmeersusi tassaavusi takornariaqarnermik ulluinnarni uummaaritsitsisut. Tikeraat naapittarpasi, nunarput oqaluttuarisarlugu angalanerannilu toqqissisimatitsivusi aammalu takornariaqarnerup najukkani inuiaqatigiinni piviusumik allanngueqataanissaanik qulakkeerinneqataavusi. Tamannalu qujamasuutigalugulu tulluusimaarutigaarput!
Visit Greenlandimit ilaquttasilu sulisusilu juullisiorluarnissassinnik ukiumullu nutaamut iserluarnissassinnik kissaappatsigit. Akisussaassusilimmik takornariaqarnerup ataatsimoorfigisatsinnik tamanik ersersitsisup ineriartortinneranik suliaqarnitta 2026-mi nangeqqinnissaanut qilanaarpugut.
Inussiarnersumik inuulluaqqusillunga
Anne Nivíka Grødem
Pisortaaneq, Visit Greenland
Continues further down the page...
