Ilulissani takornariaqarneq pillugu aaqqiagiinnginneq
Visit Greenlandimi Kalaallit Nunaata nunarsuarmi tusaamaneqarnera nukittorsarniartarparput, takornariaqarnerup inuiaqatigiinnut tamanut naleqartunngornissaa qulakkeerniarlugu. Suliaq tamanna naammagittarnermik, oqaloqatigiinnermik suleqatigiinnermillu ingerlatsisut, nunatsinniit nunallu tamalaat, akornanni pisariaqartitsivoq.
Taamaattumik Ilulissani takornariartitsisartunut aalajangersimasunut akerliussutsimik takutitsinerit eqqissiviilliortitsisut toqqissisimajunnaartitsisullu ernumanartoqartippavut. Tikeraartugut kisimik sunnerneqanngillat, aamma illoqarfimmi suliffissanik isertitanillu pilersitsisinnaasut suleqatigiinnerat sunnerneqartarpoq.
Pisortat oqaloqatigiinnermik taarsiullugu assortuunnernik kajumissaarigaangata ataatsimoorluni aaqqiissutissanik nassaarnissaq ajornakusoortarpoq – tamannalu suliffeqarfimmut ataasiinnarmut kingunerlutsitsinngilaq, kisiannili sumiiffimmut tamarmiusumut. Pissutsit maanna atuuttut kingunerisaannik umiarsuarnik takornariartaatinik tikinnissamik taamaatitsiinnartoqarneranik nalunaarfigitereerpugut.
Tamanna nunaqavissut takornariartitsinermik inuussutissarsiuteqartut isertitaannik annaasaqarnermik nalorninartorsiortitsinermillu kinguneqarpoq. Tamannali peqatigalugu avammut takutinneqarpoq Kalaallit Nunaat toqqissisimanartumik aaqqissuussaalluartumillu angalaffiunngitsoq. Tatiginninneq tamanna ukiorpassuarni ataatsimoorluta ineriartortissimavarput, tamannalu paarisariaqarparput.
Takornariaqarneq imaanngilaq „akiliisoqanngitsunik pinnguarneq“
Isornartorsiuineq isumakuluuteqarnerlu inissaqartinnissaat pingaaruteqarpoq, ajornartorsiuteqartoqaleraangalli pimoorunneqartariaqarpoq. Upperaarpulli oqaloqatigiinneq suleqatigiinnerlu aqqutigalugu pitsaanerpaamik aaqqiissuteqartoqarsinnaasoq – tamanut ammasumik ingerlatsisut ataasiakkaat pillugit akerliuneq pinnani, avissaartuutsitsivooq pingaartitatinniillu allamut saasaataalluni, pingaartitaraarpummi qulakkiissallugu takorniariaqarnerup nunaqavissunut iluaqutaanissaa.
Takornariaqarneq misigissutsinik sakkortusisitsisinnaavoq— ingammik iluaqutissat nunaqavissunut ersarlukkaangata. Oqallinnermi maannakkut sammineqartut ilagaat takornariaqarnermi nunanit allaneersunik aningaasarsiortoqartarnera, nunaqavissunullu utertut naammagineqannginneri. Ernummatigineqartoq piviusuuvoq paasinarlunilu, pimoorunneqartariaqarporlu.
Ilisimavarput umiarsuit talittarfinnut tulakkaangata tikeraallu illoqarfimmi angalaapallakkaangata inuit ilaat sunniisinnaangitsutut misigisinnaasartut. Pingaaruteqarporli paasissallugu takornariaqarneq tassaanngitsoq „akiliisoqanngitsunik pinnguarneq“, aappaata iluanaarutaa aappaata annaasaqaatigissagaa.
Takornariat Ilulissanut tikikkaangamik unnuiffissaminnut, nerisassaminnut, eqqaassutissaminnut, misigisassarsiornerminu angallannermullu aningaasartuuteqaraangata aningaasat nalingat assigiinngitsorpassuarnut ingerlateqqinneqartarput – aamma takornarianik toqqaannartumik sullissisuunngitsunut. Tassaasinnaapput eqqiaasut, aalisartut, sanasut, pisiniarfinni sulisut, caféni sulisut, taxani sulisut imaluunniit akunnittarfinnut neriniartarfinnullu pilersuisut. Takornariartitsinerup aningaasaqarnera siammasissumik paasineqartariaqarpoq aamma Isiginnittaatsimik annertunerusumik.
Suleqatigiinneq takornariaqarnermi piujuaartitsinermut aqqutissaavoq
Visit Greenlandimi kissaatigaarput takornariartitsinermit isertitat amerlanerit inuiaqatigiinniiginnarnissaat minnerunngitsumillu innuttaasut amerlanerusut namminneq atugassarititaasut naapertorlugit inuussutissarsiummut peqataanissaannut periarfissinneqarnissaat. Tamannalu iliuutsitsinnut tunngaviuvoq.
Ilisimavarput najukkami suliffeqarfinnut aningaasaliisoqartariaqartoq, ilinniartitaanissaq piginnaanngorsaanerlu ajornannginnerulersinneqartariaqartut, suleqatigiinnissamut piumassuseqartoqartariaqarpoq– minnerunngitsumillu piffissaq pisariaqartinneqartoq. Ullormiik ullormut ineriartorneq ingerlanngilaq. naammagittarsinnaassuseq, pilersaarusiorneq ataatsimoorlunilu siulersuinerlu pisariaqarput.
Ullumi takornariaqarneruo ineriartortinneqarnera ukiuni arlalinni nunaqavissut nunanilu tamalaaneersut suliniuteqarnerat aningaasaliinerallu tunngavigalugit pivoq, taakkualu namminneq nalorninartoq aqqusaarlugu, maannakkut tunngavigisarput pilerseqataaffigaat.
Aamma Ilulissani taamaappoq, takornariaqarneq nammanneqarsimavoq aallarnisaasunit – nunatsinneersunit aamma nunanit allaneersunit – nioqqutissiornikkut, tikeraartunut pilerinarsaanikkut illoqarfiullu nunarsuarmi tusaamasaanerulerneranut pilersitseqataasunik. Taamaattumik pingaaruteqarpoq nassuerutigissallugu takornariaqarneq ukiuni qulikkuutaani assigiingitsut suleqatigiinnerisa kingunerisaanik naleqarnerulersimammat.
Paasilluarsinnaavarput isertitat amerlanerusut nunaqavissunit pissarsiarineqartalernissaat kissaatigineqartoq. Tamanna anguniagaq pingaarutilik pissutissaqarluartorlu uagut aamma kissaatigaarput. Tamannali anguniarlugu pilersinneqareersut ineriartortittariaqarpavut – suleqatigiinneq aqqummik aqqutissiuussisimasoq eqiternagu. Suleqatigiinnerit pilersinneqarsimanngitsuuppat, ullumikkutuulli periarfissaqarnavianngikkaluarpugut.
Nunat tamalaat suleqatiginerat tunuarlugit imaluunniit ingerlatsisut ilaat peqataajunnaarsillugit aaqqiissutissaqanngillat. Suleqatigiinnerulli najukkami piginnaaneqarnerulersissavaatigut periarfissanillu nutaanik pilersitsilluta. Mattussineq piujuartitsisumik ineriartortitsisinnaanngilagut – namminerli iliuuseqartariaqarpugut, nunaqavissunut sunniuteqartumik, maanili najugaqartunut tamaasa ataqqineratigut.
Takornariaqarneq inunnut piviusunut inuiaqatigiinni piviusuniittunut sunniuteqartarpoq. Taamaattumik Visit Greenlandip pisariaqanngitsumik akerleriinnermik, eqqunngitsumik paasissutissiinernik tatiginninnginnermillu pilersitsisinnaasut sakkortuumik akerlerai. Isumaqatigiinnginneq pakatsineq allannguinermi pissusissamisoorpoq – kisianni siumut ingerlalluarnerusinnaavugut oqaloqatigiinnikkut, tusarnaarnikkut ataatsimullu aaqqiissutissanik suleqatigiinnikkut.
Visit Greenland
Anne Nivíka Grødem, CEO
Continues further down the page...
