2019 eqqaassagaanni akornusersuutaannginneq/piujuartisineq mininneqarsinnaanngilaq – tamanna nunani tamani eqqumaffigineqartoq aamma Kalaallit Nunaanni takornariaqartitsinerup iluani eqqumaffigineqariartuinnarpoq. Akunnittarfinni unnuisartut nunanit allaneersut, nunait allaniit timmisartumik kiisalu umiarsuarnik takornariartaatinik tikittartut amerliartuaartillugit kiisalu mittarfiit nutaat pingasut atorneqalertussanngortillugit – pinngortitamut kulturimullu tunngasut kiisalu inuiaqatigiit ataatsimut eqqarsaatigalugit, aatsaat taama sissuertariaqartigilerpugut.
Ukiuni 2020miit 2023mut nunarsuatsinni anguniakkanut periusissatut aaqqissuussamut nutaamut atatillugu, Visit Greenlandip 2020mi periusissani saqqummiuppagu aamma akornusersuutaannginneq pingaaruteqartinneqarnerpaassaaq. Periusissatut aaqqissuussat paasiuminarput – pinngortitaq sissuerlugu, kulturi tunngavigalugu nunarsuarmiunillu alutorineqarluarsinnaasunik misigisassaqartitsisarluta, siunissami aningaasaqarnikkut annertusiartortitsisoqarnissaa anguniarlugu, Kalaallit Nunaanni takornariaqarneq inerisarneqassaaq. Inuiaqatigiimmi ineriartornerannut – aamma takornariat najugaqavissullu iluaqutissillugit – takornariaqarneq pitsaasumik tapertaaqataassaaq.
Anguniakkatta iluatsittumik angunissaannut qanoq suliniuteqarnersugut iluatsitsinitsinnullu suut apeqqutaatissanerigut – periusissatut aaqqissuussaq naammassigutsigu atuarsinnaassavatit. Taanna ugguuna tamanut saqqummiunneqassammat, nutaarsiassat tulliuttut alapernaanniarigit.
Unali qularnganngilaq – takornariaqarnerup akornusersuutaanngitsumik inerisarnissaanut aatsaat tamatta peqataagutta iluatsitsisinnaavugut. Visit Greenlandimeersut tamarmik ukiumi nutaami naapinnissassinnut qilanaarput, pitsaasumillu suleqatigeqqinnissarssi kissaatigalugu.
Julia Pars, Visit Greenlandimi pisortaq.
Continues further down the page...
