2024-mi nunat tamalaanut mittarfissap siullerup naammassineqarnissaa naatsorsuutaavoq, maannangaarlu nunatta nunatsinni tikitassat tikeraat akornganniit annertuumik piumaneqarnerat misigaat. Mittarfiup Kalaallit Nunaata tamalaanut iluaqutaanissaata isumannaarnissaanut nunatta illoqarfiisa nunaqarfiisalu piumaneqarneq inuiaqatigiittut, aningaasatigut pinngortitatigullu piujuartitsisumik eqqortuutinnissaa pingaaruteqarpoq.
Visit Greenlandip aamma Innovation Greenlandip akorngini tunngaviusumik isumaqatigiissutaata ataqatigiissumik kajumissusilimmillu tikitassanut ineriartortitsinerup iluani suliaqarnissaq pingaarnertut siunertaavoq. Tamanna anguniarlugu inuussutissarsiornermi takornariaqarnermilu sumiiffimmi ineriartortitsinerup isumaginerisigut, Nunatsinni Takornariaqarnermi Inuussutissarsiornermilu Siunnersoqatigiit, Naalakkersuisut aammalu takornariasulerisut qanimut suleqatigiinnerisigut pissaaq.
“Innovation Greenlandip Kalaallit Nunaanni inuussutissarsiornikkut suliniuteqarnerit inerisarniarlugit aammalu nunap aningaasaliiffittut kajumissarnissaa anguniarlugu inuussutissarsiortutut aningaasaliiffittullu nunatut siuarsarnissaa siunertaraa. Inuussutissarsiornermi siunnersuinitsinni nunami inuussutissarsiornerit takornariaqarneq ilagalugu immikkut qitiutipparput. Visit Greenlandip suleqatiginerani iliuuseq una taperserusupparput ataatsimullu takornariaqarnerup iluani suliaqarnitsinni angusassamik toraarsisinnaalluta,” Allan Chemnitz, Innovation Greenlandimi aqutsisup oqaatigaa.
Nunarsuup sinnera qiviarutsigu ilanngussuiffigineqartoq ersarissoq takuneqarsinnaavoq, ingammik nunarsuaq tamakkerlugu Coronamik tunillaassuuttoqareernerata kingornani. Taannarpiaavorlu nunatatta, ingammik nunatta illoqarfisa minnerisa nunaqarfiisalu pigisaat: Inuiaqatigiit amerlanngitsut, inissamik aammalu pinngortitamik annertuumik pigisaqarneq.
“Piumaneqarnerup annertulinikuunera nunap tamalaani misigisassat amerlinissaannut inerisaanermi aalajangersimasumik killissaliinikkut atorluassavarput. Visit Greenlandimi illoqarfinni nunaqarfinnilu takornarialerisut ineriartortinnerisa tapersernernissaat immikkut pingaartipparput, taamaattumillu ataqatigiissumik Innovation Greenlandip suleqatiginissaa pissusissamisoorpoq. Kivitseqatigiinnikkut nunap pissarititai pitsaanerpaamik atorluassavagut,” Visit Greenlandimi pisortaaneq, Anne Nivíka Grødem nassuiaavoq.
Ulluni ukunani tunngaviusumik isumaqatigiissusiornermi suleqatigiinnermi suliniutit ersarissut nunatsinni avinngarusimasuni takornariaqarnerup inuussutissarsiornerullu ineriartortinneri qitiutillugit naatsorsoqqinneqarput.
“Nunatsinni takornarialerinerit qanoq ittut kissaatiginerlutigit qitiutissavagut, tikeraatsinnullu tikeraarnerminni suut akuuffigineqarsinnaanersut ersarissuutillugit. Nunatsinni illoqarfiit nunaqarfiillu tamarmik piviusunik pingaarutilinnillu tikeraatsinnut annertuumik piviusumillu misigisaqarnissaannut tunniunneqarsinnaasunik oqaluttuassartaqarput,” Anne Nivíka Grødem oqarpoq.
Illoqarfiit minnerit nunaqarfiillu innuttaasukitsuusut amerlasuut piniarnermik aalisarnermillu inuiaqatigiinnikkut pilersinneqarnikupput. Taamaanneratalu allatigut inuussutissarsiorluni imminut akilersinnaasumik suliffeqarfeqarnissaq, inuiaqatigiinnilu minnerusuni aningaasaqarneq patanartuutilerlugu ajornartissinnaavaa. Visit Greenlandip aamma Innovation Greenlandip suleqatigiinnerat, isertitat nutaat ineriartortinnerinut tapersiisumik niuerpalaartumik qitiutitsissaaq. Uanilu takornariaqarneq nalorninaatsumik periarfissaavoq.
“Nunatsinni inuussutissarsiornerup inerisarnerani suliaqarnitsinni naluneq ajorparput nunagisatta ilumuussusaata, pisariaqartitaata sulerusunneratalu ineriartortinnissaa tunngaviusumik pingaaruteqartuusoq. Eqinaannermi taannaavoq nunatta piujuartitsisumik ineriartornissaanut ataatsimut tapersigassarput,” Allan Chemnitz nassuiaavoq.
Pisortaaneq, Visit Greenland – Anne Nivíka Grødem, oqarasuaat 56 02 82, nivika@visitgreenland.com
Aqutsisoq, Innovation Greenland – Allan Chemnitz, oqarasuaat 53 77 77, ac@innovation.gl
Continues further down the page...