Ilaatigut isumaqartoqarpoq umiarsuarnik takornariartaatsit amerlavallaat Kalaallit nunaanni umiarsualivinni aqqusaartartut, naak tassani inatsisitigut malittarisassat aamma annikikkaluartut. Allallu isumaqarput taamatut ingerlatsissagaanni suleriuutsini pitsaassuseq suli anguneqanngitsoq. Visit Greenlandinip oqallinnermi isummat illugiit akuerai taamaalillunilu oqallisigisaq pillugu erseqqissaanerunissamut atugassanik pilersitsinissamut aalajangiussivoq.
Nuna tamakkerlugu takornariaqarnermut siunnersuisoqatigiit ukioq manna piffissami umiarsuarmik takornariarfiusartumi, takornariaqarnermik inuussutissarsiortut suleqatigalugit kalaallit nunaanni umiarsuarnik takornariartitsinermi ineriartortitsinissamut innersuussutissanik pilersitsiniarluni aalajangiussivoq.
”Umiarsuarmik takornariartitsineq pillugu isummat amerlapput. Isiginneriaatsillu assigiinngitsut soorunami tamakkiisumik isigalugu Visit Greenlandimiit akuerivagut. Sumiiffinni pineqartuni unammillernartut iluaqutissallu pillugit uagut paasisaqarnerorusuppugut. Taamaammat suliniummik peqataatitsisumik aallartitsivugut, umiarsuanik takornarialerisut kalaallit, oqartussat, sumiiffinni assigiinngitsuni pineqartuni takornariaqarnermi suliaqartut soqutigisaqaqatigiillu allat suleqatigalugit.” Anne Nivikka Grødem Visit Greenlandimi pisortaq nassuiaavoq.
Visit Greenlandip takornariaqarnermi periusissiamini – ”Takornariaqarnerunerup tungaanut, 2021-2024” aalajangiussivoq, nalinginnaasorsiortumik umiarsuarnik takornariartitsinermut siuarsaanissamut ikorfartuiniarnani. Misissuinerimmi takutippaat taamatut takornariartitsinermut suleriuseq piujuartitsisumik ineriartortitsinermut tapersiinngitsoq. Tamanna isumaqarpoq immikkoortortap taassuma tuniniaaviginissaa, Visit Greenlandip isumalluutinik atuiffiginianngikkaa. Soorlu aamma niuvernikkut saqqummersitsinerni allanilu nunat assigiinngitsut akornanni suliniutini nalinginnaasorsiortumik umiarsuarmik takornariataatsitigut siunertallit ilaaffigineq ajorai.
Kalaallilli Nunaat umiarsuarnik takornariarnermi ornitassatut nuannarineqarluarpoq, aasarlu manna umiarsuarmik takornariartaatsit aatsaat taamak amerlatigisut nunatsinni umiarsualivinnut aqqusaarput. Taamaattoqarnerani paasineqarpoq sumiiffinni amerlasuuni unammillernartoqartoq – soorlu aqqusinerni, peqqissaavinni pinngortitamilu.
”Nunap ilaani sumiiffinni pisut aallaaviginissaat pingaaruteqarpoq, taamaattumik akimortumik oqaloqatigiissinnaanissamut aqqutissiuinissarput pingaartipparput, Kalaallit Nunaanni umiarsuarnik takornariaqarnerup qanoq piujuartitsisumik ineriartortissinnaanera paasisaqarfiginerorusullugu. Suliniut siunnersuutinik arlalinnik kinguneqartitsissaaq, takornariaqarnermi malittarisassanik aggersunik suliaqarnissamut iluaqutissanik,” Anne Nivíka oqaluttuarpoq.
Visit Greenlandip aamma piumasaraa pilersitsiniarneq taamaattoq takornariaqarnermi soqutigisaqatigiinnut nukittorsaataassasoq, pingaaruteqarluinnarmammi takornariaqarnermi pisariaqartinneqartunik, aammalu umiarsuarnik takornariaqarnerup Kalaallit Nunaannut pitsaasumik sunniuteqarnissaanut piumasarineqartunik sulianik ineriartortitsinissaq.
Soqutigisaqaqatigiit imaluunniit takornarialerisut, umiarsuarnik takornarialerisutut sulilerusuttut, Visit Greenlandimut saaffiginnissinnaanerannut tikilluaqquagut. Anguniarparpummi isiginneriaatsit/isummat amerlasuut qulaajarsinnaanissaat.
Attavigiuk: Anne Nivíka Grødem, oqarasuaat 560282, nivika@visitgreenland.com
Avataaniit suliniummi aqutsisoq, Stine Selmer Andersen, oqarasuaat 586271, stine@visitgreenland.com
PAASISASSAT: Nalinginnaasorsiortumik umiarsuarnik takornariaqarneq vs. ilisimasassarsiorluni umiarsuarnik takornariaqarneq
Nalunaarusiami “Cruise Study Svalbard”(2019) umiarsuarnik takornariaqarnerup Svalbartimi inuiaqatigiinnut aningaasatigut qanoq iluaqutaatigineranik misissuivoq. Naak nalunaarusiaq Kalaallit Nunaanni sanaajunngikkaluartoq, Svalbartimi takornariarfissat Kalaallillu Nunaanni takornariarfissat amerlasuut assigiissuseqarput – taamaattumillu nalunaarusiaq taanna umiarsuarnik takornariat atueriaasaannik uagutsinnut takutitsisinnaavoq. Umiarsuimmi takornariartaatsit Svalbartiliartartut amerlasuut aamma Kalaallit Nunaannukartarput.
Nalunaarusiap takutippaa:
• Nalinginnaasorsiortumik umiarsuarnik takornariartaatsit Issittumukartartut anginerukkajupput, angalanermilu ataatsimi ornitassat arlallit angusarlugit. Saniatigut AECO-mut (The Association of Arctic Expedition Cruise Operators) – ingerlatsinermut sakkortuumik piumasaqaateqartumut ilaasortaaneq ajorput
• Issittumi ilisimasassarsiorluni umiarsuarnik takornariartaatsit 500 angunagit ilaasoqartarput, ikinnerusunik ornitaqartarlutik AECO-mullu ilaasortaasarlutik.
• Ilisimasassarsiorlutik umiarsuarmik takornariat sumiiffimmi atuinerat, nalinginnaasorsiorluni umiarsuarmik takornarianut naleqqiullugu 5,2-riaammik annertunerusarpoq.
• 2018-mi Svalbartimi umiarsuarmik takornariat 62.300 missaanniissimapput, taakkulu 72,4%-ii nalinginnaasorsiorluni umiarsuartigut takornariartuusimapput, 27,6%-iilu ilisimasassarsiorlutik umiarsuartigut takornariartuusimallutik.
• Tamakkiisumik Svalbartimut 109,5 mio. NOK-inik isertitsisimapput – 66,7%-ii ilisimasassarsiorlutik umiarsuartigut takornarianeersuupput, 33,3%-iilu nalinginnaasorsiortumik umiarsuartigut takornariartuneersuullutik.
Continues further down the page...
