Visit Greenlandip nittarsaassinermi filmiliaa Greenland Goggles 2.0 – See Greenland through local eyes – digitalitigut nassaassarsiullaqqinnermut nutaaliornermullu nersornaasiuttakkap The Lovie Awardsip ukioq manna nersornaasiinerani immikkoortuni Marketing, Advertising & PR: Branded Content-imi aamma Video Ad Long Form-imi bronzenik marlunnik nersornaaserneqarpoq. Filmiliaq nersornaaserneqarpoq piviusorsiorpalaartumik Kalaallit Nunaat nunaqavissut isaaningaannit takutinneqarmat, aammalu Visit Greenlandip ukiunut qulinut periusissiaa “Kalaallit Nunaat – suullu ataatsimoorfigisagut tamakkerlugit ” ersersinneqarmat.
The Lovie Awardsip suliaqartut Europami digitalitigut ineriartortitsinermik ilusilersueqataasut tapersersorlugillu nersorniartarpai. Nassaassarsiullaqqinneq digitalitigullu attaveqarfiit akimorlugit paasissutissiisarneq nersornaasiuttakkami ukkatarineqarput. Filmi isiginnaartumut nunaqavissup isaanit Kalaallit Nunaannik misigisaqartitsinera nersorniarneqarpoq, filmi Greenland Goggles atorlugit takusaqaannarani paasisaqarnissamut tunngammat. Naggueqatigiit Inuit isaruaat aputisiutit – seqinersiutit nunarsuarmi pisoqaanersaat – isumassarsiorfigalugit Greenland Goggles Kalaallit Nunaata nunaqavissup isaanit takutinnissaanik isumassarsiamit aallaaveqarpoq. Greenland Goggles 2.0-lu Kalaallit Nunaata piviusorpalaartumik avatangiiserisallu ataqqillugit takunissaanut, tusaanissaanut misiginissaanullu tunngavoq. Nersorniaanerup takutippaa oqaluttuat kalaallit naleqartitaannik tunngaveqartut – eqqissisimaneq, piviusorpalunneq ataqatigiinnerlu – nunat tamalaat akornanni iluarineqartut. Takornariarluni tikitassamik nittarsaassineruvoq allaanerusoq, angalatitsinermillu suliaqarfimmi ileqqorineqartut Greenland Gogglesimit unammillerneqarput atuinissaq pinnagu misigissusermik saqqummiussaqarmat.
Greenland Goggles 2.0 Visit Greenlandip ukiunut qulinut periusissiaani Kalaallit Nunaat – suullu ataatsimoorfigisagut tamakkerlugit naleqartitat assinginik aallaaveqarpoq najukkani inuiaqatigiit suleqatigalugit takornariartitsinikkut ineriartortitsineq aamma pinngortitamut kulturimullu oqimaaqatigiissitsineq ukkatarineqarlutik. Periusissiaq filmimi timitalerneqarpoq nunaqavissut nipaasa isumaasalu qitiutinnerisigut Kalaallillu Nunaata nunaqavissunit qanoq misigisaqarfigineqartarnerata takutinneqarneratigut.
“Nunarsuarmioqatitsinnut takutikkusutarpiarput pillugu Greenland Gogglesip nersorniarneqarnera tulluusimaarutigaarput: Kalaallit Nunaanni takornariartitsinerup najukkami naleqartitanik ataatsimooqatigiinnernillu aallaaveqarnera – pinngortitaq kulturilu ataqqillugit. Taamatut aallaaveqarnitta Kalaallit Nunaata nunat tamalaat akornanni takornariartitsinikkut erseqqissumik ataqqineqartumillu ilisarnaateqarnera nersorniarneqarnitsinni naqissuserneqarpoq. “ Visit Greenlandimi pisortaaneq, Anne Nivíka Grødem, taama oqarpoq.
Filmimik taasisimasut tamaasa Visit Greenlandimit qutsavigaagut. Filmi uani isiginnaarneqarsinnaavoq: Greenland Goggles
Continues further down the page...
