Nalunngisatsitut atortulersugaanermut nutaamut annertuumik aningaasaliisoqarsimavoq – Mittarfissat pingasut nutaat ammaanneqassapput, taakkunanilu siulliussalluni Nuummi mittarfissaq, ukioq manna novembarip 28.-ani ammartussaq. Tamatumani nunatsinni angalariaaseq tikikkuminassuserlu ineriartortinneqassapput, tikeraallu amerlanerusut pitsaasumik sullinnissaannut, nunallu piginnaasaanik pitsaasumik atorluaanissaq pingaaruteqarput.
Anne Nivíka Grødemip, Visit Greenlandimi pisortap erseqqissarpaa, piginnaasanik misissueqqissaarnermi siunertaammat, pilersaarusiornermi takornarianillu pitsaasumik aggutaaraluni tigusisinnaassutsip qulakkeernissaanut ikiuutitut atorneqarnissaa, taamaalilluni takornariaqarnerup ineriartornera nuna tamakkerlugu pissarsiaqaatigineqassammat. Saniatigut erseqqissaavoq takornariaqarnermi ineriartorneq akisussaanermik piginnaasanillu annertusiartortitsinissamut ukkatarinninnissamik pisariaqartitsimmat, takornariat takornariarfissallu pisariaqartitaat oqimaaqatigiissinneqarniassammata.
Visit Nuuk peqatigalugu siunnersueqatiinnikkut, Visit Greenland Nuummi massakkut piginnaasanik annertuumik erseqqissaasiorsimavoq, suliaqarfiit ukua pingasut aallaavigalugit: unnuisarfiit, neriniartarfiit angalaarnerillu/misigisassat. Ineriartornermi periarfissaasinnaasut pingasut misissuinermi aamma isiginiarneqarput (tikeraat akornanni annikitsumik, akunnattumik annertuumillu ineriartorneq), ukiuni tulliuttuni tallimani unnuiffissani imartoqqussutsinut tunngatillugu pisariaqartitanik siumut paasinninnissaq anguniarlugu. Tamanna pingaaruteqarpoq, Nuummi siulliulluni mittarfittaartussaavoq, taamaalilluni nunap sinneranut isaaffittut inissisimalissalluni.
“Paasisimasaqarluarluni pilersitsinissaq siunertaavoq, taamaalillutik massakkut piginnaasat pitsaanerpaamik atorluarneqarsinnaassapput, annertusinerullu naleqqulluartumik ingerlanneqarnissaa qulakkeerneqarluni. Misissueqqissaarnermi aamma siunertaavoq Kalaallit Nunaata takornariaqarnermut tunngatillugu piginnaasaanik, takornariallu amerlanerit qanoq inissaqartissinnaanerinik ataatsimut takunninnissaq. Ukiup immikkoortui tamarmik qanoq atorluarsinnaanerlugit immikkut ukkatarivagut.” Saniatigut erseqqissarpaa inuussutissarsiortut tassaasut takornariaqarnermik ingerlatsisut, tupigusuutigalugulu ukiuni makkunani qaammammiit qaammammut piginnaasaq qanoq ineriartortiginersoq.
Misissuinerup takutippaa, Nuuk 2024-mi Kalaallit Nunaannut isaariatut inissisimalerpat, timmisartumut ilaasut annertuumik amerleriarnissaat, taamaattumik unnuisarfinni neriniartarfinnilu imaqqortussutsit naleqqussarnissaat pisariaqarmat. Nuummi unnuisarfinnit 2023-mi nalunaarsuutit takutippaat, septembari qaammat amerlanerpaanik unnuisoqartartoq – tassa 72,6%-init. 2025-2030-mut unnuisut amerliartornerat 5%-iinnaagaluarpalluunniit, imaqqortussutsit massakkumiit annertusineqanngippata, Nuummi 2027-mi akunnittarfinni inissat ikippallaalissapput. Misissuinerup aamma takutippaa illoqarfimmi neriniartarfiit ornigarneqarnerulernikuusut, taamaalilliutik inuussutissarsiortut maanna arealinik sulisunillu pissarsiniarnerat unammillernarsinikuusoq. Piumasaqaatit tunngaviusut inisseqqappata, soorlu Nuummi talittarfimmi umiatsianut inissat amerlanerit eqquutsinneqarpata, angalaarnernut misigisassarsiornernullu tunngatillugu piginnaasaannik annertusineq allanut naleqqiullugu pisariinnerpaarpasippoq.
Misissuinerup aamma erseqqissarpaa, takornariaqarnermi annertuseriarneq inissaqartissagaanni siullertut akunnittarfinnut suliniutinik kiisalu unnuisarfinni pioreersuni imaqqortussutsit annertusinissaannut aningaasaliinerit annerusut pisariaqartinneqartut. Inerniliinermi paasineqarpoq, ajornartoortoqassanngippat unnuisarfinni neriniartarfinnilu imaqqortussutsit piaartumik annertusinissaannut suliniutinik-, kiisalu sulisussanik qulakkeerinninnissaq pisariaqarmat.
Pisortap naggasiullugu, oqartussanut, aningaasaliisunut, takornarialerisunut aallarnisaasunullu innersuutigaa, Kalaallit Nunaanni takornariaqarnermi aalajangiinerni aningaasaliinernilu, misissuineq atorlugu ilisimasat tunngavigineqartarnissaat. Naggasiullugu erseqqissaassutigaa Qaqortumi Ilulissanilu piginnaasanik misissuineq aallartisaleruttormat.
Continues further down the page...
