Maanna nalunaarutigaarput Visit Greenlandip pisortaa Anne Nivíka Grødem allamik misileerusulluni maajip naaneraniit pisortatut atorfimminit tunuarmat. Anne Nivíka ukiut tallimat Visit Greenlandimippoq, siulersuisut siulittaasup tullersortitut aallarteriarluni, 2022-mi pisortanngorpoq.
Atorfimminiinnerminilu suliffeqarfiup ineriartorneranut aammalu takornariaqarnerup ineriartornerata ilutigalugu Visit Greenlandip maanna inissisimavianut nunatsinni aammalu nunat tamalaani sunniuteqangaatsiarnikuuvoq.
Anne Nivíka nunatsinni ataatsimoortitsinikkut siuttuunermini, nunatta kinaassussaanut nukittorsaaqataanikuuvoq aammalu ataatsimoorluta aqqutissatsinnik ersarisumik pilersitseqataanikuulluni. Allanngoriartorneq annertuumi Anne Nivíka maligassiuinikuuvoq, ataatsimoortitsinikkut aammalu suliffeqarfimmi ataqatigiissaarilluni, maannalu ingerlatsinermi toqqammaviusumik kivitseqataanikuulluni.
Siulersuisut maanna Anne Nivíka Grødem qujaffigerusuppaat tatigeqatigiinnikkut suleqatigiilluarsimanermut aammalu tunniusimalluarluni Visit Greenlandimi suliaqarsimaneranut. Anne Nivíka ersarissumik siulersuinermini, sullarinnermini aammalu ataavartumik sammivimmik ukkatarinninnermini suliffeqarfiup ineriartorneranut tunniussaqarluarsimavoq. Siulersuisut maanna Anne Nivíka ingerlalluarnissaanut kissaappaat.
Siulersuisut kissaatigaat Visit Greenlandi inissisimavia isumannaajarnissaa, piffissaq ungasinnerusoq eqqarsaatigalugu aammalu piujuartumik ingerlanneqarnissaa anguniarlugu. Taamaattumik siulersuisut piaartumik nutaamik pisortartaarnissaamut suliaq aallartisassavaat.
Tassungalu atatillugu siulersuisut qujamasuutigaat Linda Kleist, maanna Head of Destination Development & Cruise-tut atorfeqartoq pisortartaarnissap tungaanut pisortaagallarniarluni akuersisimammat. Linda ukiut pingasut Visit Greenlandimi sulinikuuvoq, takornariaqarnerup iluani aammalu aqutsisutut ilinniagaqarluni. Siornatigullu sumiiffinni takornariaqarfiusuni ineriartortitsinermi aqutsisutut sulinikuulluni aamma. Pisortaagallarnerminilu suliffeqarfiup suliassaqarfii, aammalu suliat aallartisarneqareersut siuariartornissaat qulakkeernissai suliniutigissavai, pisortassamik nassarnissap tungaanut.
Visit Greenlandip siulersuisui sinnerlugit
Siulersuisut siulittaasuat, Anette Lings
Continues further down the page...
