Visit Greenlandip pisortaata juullimi pilluaqqussutaa

Asasagut suleqatit

Ukioq manna naanialerpoq, tamatumanilu inuulluaqqussut una ilissinnut apuukkusuppara:

Visit Greenlandimiit Juullimi Pilluaqqussut

Ukioq 2022 oqaluttuarisaanermut ilannguttussaavoq, Kalaallimmi Nunaanni takornariaqarneq kingumut ingerlarsoqqilerpoq – nunap immikkoortuisa ilaanni piffissaq takornariaqarfiunerusartoq oqaluttuarisaanermi ulapaarfiunersaasimalluni. Ilimagineqarsinnaavoq ukiuni tulliuttuni Kalaallit Nunaat orniffigissallugu pilerineqarneruleraluttuinnassasoq. Qanorli ililluta Kalaallit Nunaata tamatumunnga piareersimanissaa qulakkiissavarput? Qanoq ililluta Kalaallit Nunaat inuuffigiuminarsassavarput tikeraarfigiuminarsarlugulu? Visit Greenlandip siunissami suliniutissaa atserneqarsimavoq Grow Greenland. Suliniummi takornariaqarnerup Kalaallit Nunaannut pitsaaqutaanissaa inuiaqatigiillu qitiutinnissaat ukkatarineqassapput.

Visit Greenlandi suliffeqarfittut aamma ikaarsaarnerup iluaniippoq. Apeqqarissaarsimanerit misissueqqissaarnerillu aallaavigalugit sullerissutsip annertusarnissaanik Kalaallillu Nunaanni najugaqartut piginnaaneqarnerisa ineriartortinnissaannik suliffeqarfik aalajangiisimavoq. Marsi 2023 aallarnerfigalguu suliffeqarfimmi sulisut tamakkerlutik pisortatigoortumik Nuummi allaffeqarfimmi ataatsimuulissapput suliffeqarfiullu sannaa nutarterneqassalluni. Suliffeqarfiup sumiiffimmi takornariartarfiit ineriartortinnissaat ukkatarinerulissavaa saniatigullu avammut paasititsiniaanermut pilerisaarinermullu suleriaaseq angusassamik toraagalimmik ingerlanneqarnerulissalluni.

2022 utimut qiviassagaanni, Islandimi, Savalimmiuni Kalaallillu Nunaanni angalatitsisut saqqummersitsinerannik Vestnordenimik aaqqissuussisimaneq eqqaanngitsoorneqassanngilaq. Inuit 420-t suliffeqarfiinniit 224-neersut nunarsuaq tamakkerlugu peqataasimapput, taakkulu 3000-riarlutik ataatsimiissimapput. Eqqaanngitsuussanngilarput aamma peqataasut 60-t ‘Date a Destination’-imut ilaasimammata – tassa nunap immikkoortuinut tamanut pre-tourseqataasimanermikkut.
Kalaallit Nunaata sermersuani unnuineq, Tunup kujataani ilisimasassarsiorluni umiarsuarmik angalaarnermi nannunik isiginnaarneq, nerisassatigut piorsarsimassutsimik-, tammaarsimaanermik-, alutorsarluni tammaarsimaarnermik (glamping)- aamma ilorrisimaarluni (wellness) misigisaqarnerit. Takornarialerisut suleqatillu – pingaartumik nunap immikkoortuini takornarialerinermi siunnersuisoqatigiinnut (DMO-nut) tamakkuninnga periarfissiisimanerannut qujarusuppugut!

Saqqummersitsinermi paasisat ilagaat angalanermut atatillugu Kalaallit Nunaat logistikkitigut qanoq inissisimanersoq. Uppernarseqqinneqarpoq Kalaallit Nunaanni takornarialerisutut suliaqassagaanni ilimaginngisat naatsorsuutisarnissaasa pingaassusaat; assersuutigalugu silamut logistikkimullu tunngatillugu. Taamaattoq eqqaamasassaavoq Ilulissani Nuummilu 2024-mi mittarfittaassat, toqqaannartumik Kalaallit Nunaannut isernissamik periarfissiisussat iluaqutigalugit ingerlaqqinngitsoortarnerit ikilisinneqartussaassammata. Qaqortumi aamma mittarfittaassaq 1500-nik, 1799 miiterinillu takissisuseqarsinnaasoq aamma sanaartorneqassaaq. Taakkuali pitinnagit maanna Billundimiit Kalaallit Nunaannut timmisartuussisalernissat nutaat, Kalaallillu Nunaanni timmisartuussinermut piffissat tallineqarnerni, ass. Københavnimiit Narsarsuarmut aprilimiit aallartittalernera iluaqutigalugit Kalaallit Nunaannukarsinnaaneq pisariinerulissaaq.

Kalaallit Nunaanni takornariaqarnermut ineriartortitsinitsinni pilerisaarinitsinnilu suli tapersiinissinnut qujarusuppugut, ingerlariaqqinnissatsinnilu peqatiginissarsi qilanaaralugu!

Anne Nivíka Grødem

Pisortaq, Visit Greenland