Visit Greenlandip takornariaqarnermut naatsorsuutit siullersaat saqqummiuppaat

Visit Greenlandip siullerpaamik takornariaqarnermut ingerlatsinermut naatsorsuutit – tassaasoq Tourism Satellite Account (TSA) – saqqummiuppaa. Nalunaarusiap takutippaa takornariaqarneq 2024-mi naatsorsuutinut naapertorlugit Nunatsinni BNP-p 4,9 %-ia aammalu innuttaasut 1.800-it akornanni sulisuusut toqqaannartumik takornariaqarnermut attuumassuteqartut.

Nuuk, ulloq 27. maj 2025

Naatsoorsuusioriaaseq nunarsuaq tamakkerlugu akuerineqartumik suliarineqarsimasoq uppernarsarpaa takornariaqarneq nunatsinni aningaasarsiornikkut pingaaruteqartuusoq. 

2024-mi takornariaqarneq 1,245 mia. kr.-nik iluanaartitsivoq suliffinnillu 1.800-nik toqqaannartumik pilersitsilluni. Tamanna isumaqarpoq takornariaqarneq 2024-mi nunatsinni BNP-p 4,9 %-ianik inuiaqatigiinnilu suliffinnik tamarmiusuni 6 %-it  sinnerlugit pilersitsisimasoq. 

“Takornariaqarneq inuiaqatigiinni pingaaruteqartorujussuuvoq – takornariaqarnermi sulisunuunnaanngitsoq, kisiannili aamma inuiaqatigiinni tamani. Suliffinnik pilersitsisarpoq, isertitanik pilersitsisarpoq minnerunngitsumillu ineriartortitsinissamut periarfissanik pilersitsisarluni. Takornariaqarneq namminerminni kisimi siunertaqanngilaq – kisiannili inuuiaqatigiinni ineriartornermut sakkussaalluni. Taamaammat pingaaruteqarpoq sukumiisunik paasissutissanik maanna peqalersimanerput – taamaalilluta takornariaqarneq akisussaassuseqartumik ineriartortissinnaanngussavarput – Nunarput, ataatsimoorfigisagut aammalu immitsinnut ataqqilluta”

– Anne Nivíka Grødem, Visit Greenlandimi pisortaq oqarpoq.

2024-mi takornariat nunatsinni katillugit 3 mia. kr.-inik atuisimapput – taakkunannga 58 %-it nunanit allanit tikittunit. Aningaasartuutit angallannermut, akunnittarfinnut, misigisassanut, nerisaqarnermut aammalu nunatsinneersunik tunisassianik agguataarneqarsimapput – taamaalillunilu inuiaqatigiit akornanni ingerlatitsiingaatsiarlutik.

ATAATSIMOORUSSAMIK AALLARNERFIK – ILIUUSEQARTITSINISSAMULLU SUAARUTIGINNINNEQ

Takornariaqarnermut naatsorsuutit aallarniutaavoq nunatsinni takornariaqarnerup qanoq pingaaruteqartiginera erseqqissumik paasisaqarfigineqarsinnaalerneranut. Naatsorsuutit ullumikkumut killiffissiuinnarnagilli ilanngullugit siunissamut periarfissat suusinnaanerinut tikkuussisuuvoq.

“Takornariaqarnermut naatsorsuutit pilersinneqarneratigut erseqqissumik ilisimalerparput takornariaqarnikkut sumi inissisimanerluta, tamannalu amigaatiginikuuarput. Ataatsimoorussamik tunngavissatsinnik pilersitsivoq, takornariaqarnermilu tullertut alloriaqqiffissamik aqqutissiuisuulluni. Qiimmaallannarpoq suliffiit takornariaqarnermi amerliartorneri aammalu takornariaqarneq aningaasarsiornikkut immikkoortortaqarfittut pingaarutilittut inissisimalersimanera qanimut uppernarsarlugu. Maanna anguniagassaq tulliusoq tassaavoq ineriartortitseqqiinissamut alloriarnissaq – aningaasatigut annertusinerinnaanngitsoq, nunarpulli tamakkerlugu takornariaqarneq ineriartorteqqinnissaa, amerlanernut iluaqutaanerulernissaa aammalu ukioq kaajallallugu suliffissaqartitsinermut periarfissiisinnaanermut ujartuineq anguniarlugu. Tamannalu kisimi pisinnaavoq Namminersorlutik Oqartussanit, kommuninit, suliffeqarfinnit aammalu innuttaasut akornanni suleqatigiinnikkut. Kisitsisit uppernarsarpaat periarfissat piusut, taakkulu periarfissat atorluassavagut.” – Naaja H. Nathanielsen, Inuussutissarsiornermut, Aatsitassanut, Nukissiuutinut, Inatsisit Atuutsinneqarneranut Naligiissitaanermullu Naalakkersuisoq oqarpoq.

Visit Greenlandip erseqqissaassutigaa naatsorsuusiarineqarsimasoq ulluinnarni atorneqartassaasoq aalajangiinerni tunngaviusussatut aammalu takornariaqarnermi ineriartortitsinermi aallaaviussasoq, kiisalu Naalakkersuisut takornariaqarnermut pilersaarutaat qanittumik ataqatigiissillugit, aammalu Visit Greenlandip ukiuni qulini periusissiaat nutaaq, KALAALLIT NUNAAT …suullu ataatsimoorfigisagut tamakkerlugit

KISITSISIT PINGAARNERIT

Takornariaqarnermut naatsorsuutit TSA – tassaavoq nunarsuaq tamakkerlugu naatsorsuusioriaaseq akuerineqarnikoq, takornariaqarnerup iluani aningaasarsiornikkut  sunniutaanik paasisaqarfiginninnermut. Nunatsinni takornariaqarnermi naatsorsuutit Rambøll Management Consulting-imit suliarineqarpoq, Visit Greenlandimut. Aningaasaliifineqarsimallunilu EU-p “Green Transition”-imik taaguutilimmik suliniuteqarfianit.

Takussutissiat pingaarnerit – TSA 2024:

• Nunatta BNP-iata 4,9%-ia takornariaqarnermeerpoq
• 2024-mi takornariat ataatsimut 3 mia. kr.-inik nunatsinni atuipput, taakkunanilu
  • 1,7 mia. kr. nunanit allaneersunit (58 %) 1,2 mia. kr. nunatsinni innuttaasut akornanneersuullutik (42 %)
  • Nunanit allaneersunit aningaasartuutit: timmisartuussinermut (31 %), misigisassanik (14 %), akunnittarfiinnut nerisassanullu (21 %)
• Sulisuusuni tamarmiusuni sulisut 1.800-it agguaqatigiissillugit takornariaqarnermut attuumassuteqarput (tassaasoq suliffeqarfiusuni tamani 6,2 %)

Naatsorsuutit takussutissiarineqarput takornarianik apersuinernit, Namminersorlutik Oqartussaniit naatsorsuutit aammalu Kalaallit Nunaanni Naatsorsueqqissaartarfimmit kisitsisit tunngavigalugit.

Kalaallit Nunaanni Takornariaqarnermut Naatsorsuutit 2024 nittartakkami uani atuarneqarsinnaavoq: tourismstat.gl