Marlunngornermi ulloq 26. maaji 2026 ileqquusumik ataatsimeersuarnermi ukiumoortumik nalunaarusiaq 2025-moortoq Visit Greenlandip akueraa, ersarissaatigalugillu nunat assigiinngitsut akornanni Kalaallit Nunaannit annertunerusumik ukkassisimanerat, periusissiornikkut sammivimmik patajaannerulersitsineq aammalu takornariaqarnerup ineriartornerani najukkamik aallaaveqarnissamik ukkassinerusoqalernera ukiumi tamatumani sunniuteqarsimasut.
Siulersuisup nalunaarusiaani siulersuisuni siulittaasup Anette G. Lingsip erseqqissaatigaa ukioq 2025 immikkuullarissuusimasoq. Nunat assigiinngitsut akornanni nunatsinnik soqutiginninneq malunnarsimavoq, nunallu qanoq nittarsaanneqarnissaata ilusilersorneqarnissaanut takornariaqarnerullu ineriartornerata sammivilernissaanut Kalaallit Nunaata nammineerluni peqataanissaata pingaaruteqassusaa tamatuma naqissuserpaa.
Visit Greenlandip ukiunut qulinut periusissiaata ”Kalaallit Nunaat… suullu ataatsimoorfigisagut tamakkerlugit” saqqummiunneqarnera 2025-imi inernerusunut qitiulluinnarsimavoq. 2035-ip tungaanut sulinissaq periusissiap siunnerfilerpaa, takornariaqarnikkullu annertusaanerup inuiaqatigiinnut pitsaasumik iluaqutissiinissaa ersarissumik anguniagassatut tunngavigineqarpoq. Tamanna isumaqarpoq takornarissat tikittartut amerlassusaat kisiisa aallaaviginagit suliffissalli pilersinneqartut, najukkami periarfissat inuiaqatigiinnullu iluaqutissat pilersinneqartut ilanngullugit uuttuisoqartassasoq.
Aammattaaq Visit Greenlandip Nunatsinni takornariaqarnikkut ingerlatsinermut naatsorsuutit siullerpaamik 2025-imi saqqummiuppai. 2024-imilu takornariaqarnerup 1,245 mia.kr. -nik tunniussaqarlunilu Nunatsinni innuttaasunut 1.800-inik suliffissaqartitsinikkut pilersitsiviusimanera tamatuma ersersippaa. Tamatuma assigaa BNP-ip 4,9 procentia, suliffissaqartitsiniarnerullu tamakkiisup 6 procentia sinnerlugu. Siumut isigisumik takornariaqarnerup pilersaarusiornissaanut suliniutillu pingaarnersiorneqarnissaannut kisitsisit nukittunerusumik tunngavissaqartitsilerput.
“Nunat assigiinngitsut akornanni Kalaallit Nunaannik soqutiginninneq annertusiartuinnartoq ineriartortitsinissamut periarfissaqalersitsivoq, pingaaruteqarnerulersillugulu nammineerluta peqataaffigisatsinnik sammiviliinissarput. Takornariaqarnerup ineriartornera Visit Greenlandimut kisitsisitigut qaffassaanerinnaanngilaq, tassaallunili soqutiginninnerup inuiaqatigiinnut pitsaasumik iluaqutissiissutinngortinnissaa. Tamatumami nassatarissavai najukkami suliffeqarfiit patajaannerusut, inuusuttunut periarfissiissutissat nutaat aammattaarlu pinngortitamik, piorsarsimassusermik nunalu tamakkerlugu ulluinnarni inuunermik ataqqinnissuseqarluni ineriartortitsinissaq,” pisortaq Anne Nivíka Grødem oqarpoq.
Innuttaasunik, kommuninik, nunap immikkoortuini suliniartunik suliffeqarfinnillu oqaloqateqarnerup nukittunerulersinnissaa Visit Greenlandissaaq 2025-imi ukkassimavaa. Nunatsinni sumiiffinni arlalinni najukkami ingerlatsinerni pisariaqartitat misilittakkallu tusaaniarneqarsimapput, taamaalilluni inuit sumiiffiillu kalluarneqartut aallaavigalugit takornariaqarnerup ineriartortinnissaanut tunngavissat pitsaanerusut pilersinneqarsimallutik.
Ilaatigut innuttaasunik oqaloqateqarnerit, innuttaasut takornariaqarnermut isiginnittaasiat pillugu ilisimasanik katersinerit kiisalu isorliunerusuni najukkami ineriartortitsinikkut ingerlatsinerit aqqutigalugit ingerlatsisoqarnikuuvoq. Najukkami tapersersuineq sumiiffinnilu ataasiakkaani periarfissat, aarleqqutit pisariaqartitallu isiginiarneqarnerat aqqutigalugit, takornariaqarnerup ineriartortinnissaata qulakkeerneqarnissaa siunertaavoq.
“Piffissami allanngorarfiusorujussuarmi Kalaallit Nunaanni takornariaqarneq ineriartorpoq. Taamaammat ataatsimoorussamik tunngaveqarluta, nunalu tamaat ataatsimut isigalugu sulinissarput aalajangiisuulluinnartussaavoq. Periusissiornikkut tunngavimmik, nalunaarsuutitut tunngavinnik Visit Greenland 2025-imi patajaallisaasimavoq, najukkamilu takornariaqarnermik ullut tamaasa ilusilersueqataasut takornarialerisut suleqatigisimallugit. Siuariartornerlu iluaqutigineqassappat tamanna pingaaruteqarpoq,”siulersuisuni siulittaasoq Anette G. Lings oqarpoq.
Tamakku saniatigut ukiup ingerlanerani nunat assigiinngitsut akornanni Nunatta saqqumilaartinneqarneranik, nunap tamarmiusup ilisarnaataata ineriartortinnissaanik ingerlatseqatigiiffiullu digitalikkut ingerlatsivianik pitsanngorsaanermik Visit Greenland suliaqarnikuuvoq. Kalaallit Nunaata ataqatigiinnerusumik nittarsaannissaa, nunallu assigiinngitsut soqutiginnikkiartuinnarnerat naleqquttumik akisussaassuseqartumillu artukkiinani ingerlanneqarnissaa suliniutit taakku ikorfartussavaat.
Aningaasaqarneq qiviassagaanni 2025-imi Visit Greenland 412.t.kr.-nik sinneqartooruteqarpoq, ingerlatsiviullu siunertaanut naleqqiullugu angusaq siulersuisut naammagisimaarluarpaat. Aningaasaqarnikkut angusat periusissiaqarnikkullu sammiviup uppernarsarpaa, sunniuteqarluartumik siunissarlu ungasinnerusoq eqqarsaatigalugu piujuartitsiffiusumik ukkassilluni aningaasaliissutit atornissaannut Visit Greenland pisussaaffeqartoq.
Ataatsimeersuarnermi Anette Lings, Hotel Sisimiut pisortaat siulersuisuni siulittaasutut qinigaaqqippoq. Taamatuttaaq siulersuisuni ilaasortat Gerth P. Olsen, Kattie Nielsen, Heidi Jensen aamma Erik Palo Jacobsen qinigaaqqipput. Ullormilu siulersuisut inissitsiterlutik ataatsimiinneranni, Kattie Nielsen siulittaasup tulliatut qinerneqarpoq.
2026-imi Visit Greenlandip akisussaassuseqartumik takornariaqarnermik ineriartortitsineq, innuttaasunik peqataatitsineq aammalu takornariaqarnerup qanoq isumaqartinneqarnera pillugu ilisimasanik nukittorsaaneq ingerlateqqissavai. Ilutigitillugulu nunat assigiinngitsut Kalaallit Nunaannut soqutiginnileriartuinnarnerat takornarissat amerlanerusut takornariarnissaannut, nunamullu tamarmut pitsaasumik iluaqutaanerulersinnissaanut timitalersuissaaq. Takornariaqarnerup Kalaallit Nunaata peqataaffigisinnaasaatut ineriartortinnissaa, aammalu piujuartitsiffiusumik periarfissanik pilersitsisoqarnissaa nunallu tamarmi pitsaasumik iluaqutissarsinissaa suli anguniagaavoq.
Continues further down the page...
