Ukiuni marlunni nunarsuaq tamakkerlugu nappaammik tunillaassuuttoqareersorlu 2022-mi umiarsuartigut takornariartaatitigut takornariat kingumut tikeralerput amerlaqalutik. Ukioq 2022 takornarialerisunut ulapiffiusimaqaaq umiarsuit takornariartaatit nunatsinnut tikittut 425-nit amerlanerusimammata. Peqatigitillugulu umiarsuit takornariartaatit tikittartut amerlaqisut pillugit inuiaqatigiinni oqallinneqalersimavoq, ilaatigut nuannaarutiginnittut ernumassuteqartullu oqallinnertigut tusarsaasimallutik.
Visit Greenlandip oqallinnermi illuatungeriissut isumaat miserratiginngilai, 2022-milu ukiuusoq aalajangerpoq nunatsinni umiarsuartigut takornariartaatitigut takornariartitsinermi aporfiusartut periarfissallu erseqqissassallugit nassuiassallugillu. Misissuineq maanna naammassisimalerpoq, inerniliunneqartullu nittartakkakkut isumasioqatigiinnermi inunnit 65-nit amerlanerusunit peqataaffigineqartumi saqqummiunneqarlutik.
Misissuineq aallarnerneqalermat aporfiusartut periarfissallu erseqqissarneqarnissaannik suliaqarnissamut Visit Greenlandip nunatsinni umiarsuartigut takornariartitsinermik suliaqartut peqataaqqullugit qaaqqusimavai. Takornarialerisut, oqartussat, takornarialerinermi siunnersuisut takornariaqarnermullu tunngasutigut suliaqartut allat misissuinermut, takornariaqarneq pillugu arlariinnik innersuussuteqarnermik inerneqarfiusumut, suliassaqarfimmilu tamatumani killigisassatut piumasaqaatit ineriartortinneqarnissaannut iluaqusersuutaajumaartunik innersuussuteqarfiusumut, peqataasimapput.
”Misissuinerup inernerisa takornarialerinerup iluani soqutigineqartunik tamalaarpassuarnik ersersitsinissaat aammalu taakkua imminut nappassinnaasumik ineriartortitsisoqarnissaa anguniarlugu qanoq iliorluni suliaqarfiit assigiinngissitaartut suleqatigiinnerannik pitsanngorsaanissamut isumassiorfissanik tunisinissaat siunertaapput. Tamanna umiarsuartigut takornariartaatitigut qanoq amerlatigisunik takornariaqartitsisoqartarnissaanut Visit Greenlandimit tunngatinneqanngilaq. Tamatumanili pineqartut tassaapput takornariarfiusumi takornarialerinissamut piginnaassuseqarnerup takornariallu amerlassusiisa oqimaaqatigiissinniarneqarnissaat aammalu inuit, avatangiisit aningaasarsiornerlu eqqarsaatigalugit imminut nappassinnaasumik takornarialerisoqarsinnaanerata siuarsarneqarnissaa,” Visit Greenlandip pisortaa Anne Nivíka Grødem nassuiaavoq.
Misissuinerup inernerisa ilaatigut takutippaat takornarialerinermik suliallit umiarsuarnut takornariartaatinut annerusunut ilisimasassarsiortullu umiarsuaannut minnerusunut isumaat assigiinngitsuusut. Suliffeqarfiit apersorneqartut amerlanersaasa ilisimasassarsiortut umiarsuaat ikinnerusunik issimasoqartartut piumaneruaat, tamakku sivisunerusumik nunatsinniittarnerat, tikitaminni nioqqutigineqartunik amerlanerusunik pisisarnerat kiisalu inuiaqatigiinnut ataqqinninnerullutillu soqutiginninnerunerat malugisaannaramikku.
Suliffeqarfiilli allat umiarsuit takornariartaatit annerusut piumanerullugit nassuiaapput, tamakku amerlanerusunik sullissaqarnissamik, aningaasatigut isertitsinerunissamut periarfissanik aammalu sumiiffimmi tikitami takornariatut sullinneqarnissamik pisariaqartitsisoqalerneranik kinguneqartarmata.
Takornarialerinermilli suliaqartut arlalinnik pingaarnerutinneqartariaqartunillu isumaqatigiissuteqarput. Tamakku tassaapput:
Suliffeqarfiit niuernermik tunngaveqartut amerlasuut, takornarialerinermut tunngasunik suliaqartut, nunatsinni umiarsuartigut takornariartaatitigut takornariartitsinikkut naammattumik isertitsisoqartannginneranik paasinnittoqarnera ernumassutigalugu ersersippaat. Taakkumi oqaluttuarput umiarsuit takornariartaatit aningaasarsiornissamut pinngitsoorsinnaaneq ajorlugit pinngitsoorsinnaanngingajattarlugilluunniit, takornarianillu sullissisarneq suliffeqarfiup piuinnarnissaanik, atorfinitsitsinissamut periarfissaqarnerunissamik kiisalu ukiup ilaata nioqquteqarluarfiunerusup sivisunerunissaannik qulakkeerinnittartoq.
”Nunatsinnut amerlanerusut takornariartarnissaat aammali pitsaanerusumik takornarialerinissaq pisariaqartipparput. Taamaattumik suliaqarfiit oqartussaaffiillu assigiinngitsut umiarsuartigut takornariartaatitigut takornariartitsinerup ineriartortinneqarnissaannut pitsaanerpaamik sinaakkusiinissaq qulakkeerniarlugu suleqatigiinnissaat pisariaqartipparput. Visit Greenland oqaloqatigiittoqarnissaanik tapersersuinissaminut piareersimavoq, taamaasilluta peqatigiinnikkut imminut nappassinnaasumik ineriartortitsinissaq qulakkeersinnaassavarput,” Visit Greenlandip pisortaa Anne Nivíka Grødem oqarpoq.
Visit Greenland naliliivoq misissuinerup inerneri amerlasuunut soqutiginarsinnaallutillu naleqquttuusinnaasut, taamaattumillu inernerit nittartakkakkut saqqummiunneqareerput aammalu nittartakkakkut isumasioqatigiinnermi umiarsuaateqarfiit nunanit tamalaaneersut takornarialerinermillu suliallit nunatsinneersut peqataaffigisaanni saqqummiunneqarluni. Pisortattaaq erseqqissaatigaa misissuineq nunatsinni takornarialerinermi siunnersuisunut soqutiginartunik nutaanillu paasissutissiisimasoq, paasisallu tamakku periusissiaqarluni sulinissami atorneqarumaartut, soorlumi misissuinermit inernerit Naalakkersuisunut tunniunneqareersut.
Aamma siornatigut tusagassiorfinnut nalunaarutigineqareersoq uani atuarsinnaavat.
Anne Nivika Grødem,
+299 560282
nivika@visitgreenland.com
Visit Greenland: 2022 aatsaat taama amerlatigisunit takornariaqarfiusoq
Scroll to top