Niuernermik Ineriartortitsineq

Kalaallit Nunaanni takornariaqarnerup iluani niuerfittut suli anginerpaatut inissisimavoq, timmisartumi ilaasut 32%-ii Danmarkimi najugaqartuullutik. Taamaakkaluartorli danskit niuerfianni ukiuni kingullerni unikaallanneqarsimavoq. Annertunerusumik Kalaallit Nunaat Danmarkimi angalatitsivinnut aammalu angalanermi aaqqissuisartunut ussassaarinermi sulianik aammalu paasissutissanik tunniussisarpoq, tassani taakkua namminneq niuerniarnerminni atorsinnaasaannik. Danskit niuernerannut atatillugu anguniagaq tassaavoq niuernerup ataatsimut alliartornerata 1%-imiitinnissaa. 2016-2019 anguniakkani ukiumut danskit niuerfiinit ingerlanneqartut 1%-imik qaffariartarnissaat aalajangiunneqarnikuuvoq.

Island immini takornariaqarnikkut niuerfiunngikkaluarpoq; Taamaakkaluartorli suleqatigisatut ataqatigiissaarinermi pingaaruteqarluinnartutut inissisimavoq, takornariat Keflavikip timmisartoqarfia aammalu Reykjavikip timmisartoqarfia aqqusaarlugu Kalaallit Nunaannut takornarissatut angalasut eqqarsaatigalugit, kiisalu takornarissat Island Kalaallillu Nunaat angalanermi tikissallugit siunnerfeqartut eqqarsaatigalugit. Taamaattumik Kalaallit Nunaata Islandimut suliniutai Islandip Kalaallit Nunaatalu akornanni silaannakkut angallannermi aqqutissanik tapersersuinermut samminerupput, aammattaarlu Islandimi angallannermi aaqqissuisunik kiisalu suliniuteqartunik suleqatigiinnermik pilersitsinissamut sammisuusut, matumani ussassaarinermi atortussanut, nuerfinnik misissueqqissaarnernut, niuernermut atatillugu sukumiisumik suliniutaasunut, FAM Trips kiisalu tusagassiornermut tunngasumik angalanernut tunngasunik. Takornariaqarnerup iluani suliniutinik aammalu niuerfinni aalajangersimasumi niuernikkut misissueqqissaarnernut tunngasunik Island, Kalaallit Nunaat, Savalimmiullu NATA (North Atlantic Tourism Association) aqqutigalugu qanimut suleqatigiipput.

USA Canadalu katillugit niuerfittut Tysklandimiit anginerupput, 2014-imi ukiup affaata aappaaniit 2015-mi ukiup affaata aappaanut 124%-imik niuernikkut qaffariaateqarujussuarsimalluni. USA-mi angallannikkut niuerneq annertutillugu Kalaallit Nunaata USA-mut aammalu Canadamut suliniutai nunap assingani nalunaarsornissaannik, aammalu aaqqissuisut suleqatigeriikkat ataqatiginissaannut aqutsinermik ukkataqartuupput, matumani angalatitsiviit suliniuteqarfiillu Kalaallit Nunaannik ornitassatut portfoliominni peqataasitsisut, malinnaaviginninnermi tikeraarnerit, tusagassiutilerinermi tusagassiortunut Amerika Avannaaneersunik salliutitsineq, najugarisami angalatitsiviit Amerikap Avannaani aaqqissuisullu ataqatigiisinneri, Amerikami attaveqaqatigiiffinnut Kalaallit Nunaat takornariaqarnikkut ornitassatut nittarsaannerani oqaluttuanik assigisaanillu ikkussinerit, saqqummersitsinerni peqataanerit, workshop-inut assigiinngitsunullu kateriffittut aaqqissuussaasunut Kalaallit Nunaannit aallartitaqarfiusunut peqataanerit, kiisalu ussassaarinermi atortunik tunniussinerit Greenland.com-imilu ikkussisinnaanermut periarfissiinerit. 2016-2019 anguniakkani Amerikap Avannaanut niuerneq ukiumut 15% missaani qaffariartussatut inissinneqarsimavoq.

Kalaallit Nunaanni niuerfittut anginerpaap tulleraa Tyskland, matumani 2014-imi ukiup affaata aappaaniit 2015-imi ukiup affaata aappaanut 22%-imik qaffariaateqarsimalluni. 2012-imi niuernikkut misissueqqissaarnerup takutippaa Tyskit Kalaallit Nunaat pillugu annertuumik ilisimasaqartut. Kalaallit Nunaata Tysklandimut suliniutai tassaanerupput angalatitsiviit neriunartut nunap assingani nalunaarsornissaat, imaluunniit Kalaallit Nunaannut peqataanermik annertusititsiniartut, FAM Tripsinik Kalaallit Nunaanni neqerooruteqartut, tusagassiinermi angalanermi tyskit tusagassiortuinik salliutitsineq, saqqummiussinerni kateriffittullu aaqqissuussinernut assigiinngitsunut peqataanerit, kiisalu ussassaarinermi atortunik tunniussinerit Greenland.com-imilu ikkussisinnaanissamut periarfissiinerit. 2016-2019 anguniakkani Tysklandimut niuerneq ukiumut 15% missaani qaffariartussatut inissinneqarsimavoq.

Frankrig aammalu Storbritannien Kalaallit Nunaanni niuerfittut pingaaruteqarluartutut inissisimapput, tamarmik sanilliussinikkut (22%-imik aammalu 42%-imik 2014-imi ukiup affaata aappaaniik 2015-imi ukiup affaata aappaanut) qaffariaateqarsimallutik, maannalu tamarmi Islandimik niueqateqarnissamik annertuumik suliaqarlutik. Anguniakkanut piffissaliussami Kalaallit Nunaata Frankrigimut aammalu Storbrittanniemut suliniutai annerusumik ukuupput: Kalaallit Nunaanni niuerfiit aaqqissuisullu nunap assingatigut nalunaarsorneri, aammattaarlu aaqqissuisut suleqatigisat qanimut suleqatigilernerunissaat FAM Tripsinut atatillugu, tusagassiornikkut, Kalaallit Nunaat pillugu ilisimasanik ineriartortitsinerit niuernikkut tapersersuinerup iluani ussassaarinermi atortussanik tunniussinikkut aammalu Greenland.com-imi ikkussisinnaanissamut periarfissiinerit. 2016-2019 anguniakkani Frankrig ukiumut 15% qaffariaateqartussatut inissinneqarsimavoq, storbritannielu ukiumut 10% qaffariaateqartussatut inissinneqarsimalluni.

Naak Asiami takornariaqarnikkut Kalaallit Nunaannut niuernemi kisitsisaasut suli annikikkaluartut ukiuni kingullerni pingaartumik Taiwanimiit aammalu Kinamiit soqutiginninneq qaffariaateqangaatsiarsimavoq. Niuernerfiit taakku Kalaallit Nunaannut neriunaateqarluartumik inissisimapput, pingaartumik Islandimi ineriartortitsinerat eqqarsaatigalugu. Kalaallit Nunaata Asiamut suliniutaat annerusumik tunngavinnit pingasuusunik ingerlanneqarput. Siullermik Skandinaviami Islandimilu soqutigisaqaqatigiinnik suleqateqarneq, soorlu takornariaqarnikkut siunnersuisunik aammalu timmisartuutileqatigiiffinnik, nunap misilittagaqarnerulerata aammalu periarfissaqarluarnerata saqqumilaartinnerulernissaa anguniarlugu. Tulliatut, Asiami angalatitsivinnik soqutigisaqaqatigiiffinnik suleqarnerup iluani Kalaallit Nunaannut angalanermi aqqutissat nunap assingani takussutissaliornissaat, attaveqaqatigiiffiit atorneqarsinnaasut ilisimalernissaat, FAM Tripsinik aaqqissuiniarnikkut, kiisalu ingerlatsisunut workshopertitsinerit. Pingajuattut, Kalaallit Nunaanni Namminersornerullutik Oqartussanik takornariaqarnerup iluani Kalaallit Nunaanni inuussutissarsiornikkut suliniutit assigiinngitsut ataatsimut ilutigalugit tamakkiisumik inuutissarsiutitut ingerlanneqarlualernissaa anguniarlugu suleqateqarneq. 2016-2019 anguniakkani Asiami niuernerup ukiumut 15% qaffariaateqartussatut inissinneqarsimavoq.

Takornariartaassuarnik angallannermi niuerneq ukiuni arlalinni uninngakannereersimalluni 2015-imi 11%-mik qaffariaammik takutitsivoq. Takornariartaassuarnik angallasinerup iluani sinaakkusersuutit nutaat Takornariartaassuarnut pioreersunut iliuuseqarnissamut paasissutissiissuteqarnissamik pisariaqartitsinermik pilersitsisimavoq, taamaasillunilu Takornariartaassuarnik nutaanik pilersitsinissamik aamma ammaassisuusimalluni. Kalaallit Nunaata imartani takornariartaassuarnut suliniutai tassaanerupput attaveqatigiinnerit pilersinnissaat ingerlatiinnarnissaallu, ingerlaarfinnik ikorfartuinissaq, sumiissusersiornerup iluani malittarisassat paasissutissiissutiginerat, kiisalu USA-imi Europamilu takornariartaassuarnut atatillugu saqqummersitsinernut peqataanerit. Takornariartaatit mikinerusut eqqarsaatigalugit, suleqatigiinnermi imarisamik ineriartortitsinissaq, ussassaarineq, niueritigineqartup ineriatortinnissaa piareersarfigineqarnissaalu ukkatarineqassapput, matumanilu aamma ornigunnerit workshopertitsinernut assigisaanullu peqataanerit ingerlanneqassallutik. 2016-2019 anguniakkani takornariartaassuarnik niuernerup (Takornariartaatinut ilaasut Kalaallit Nunaanniitillugit) ukiumut 3,5%-imik qaffariarnissaa inissinneqarsimavoq.

Siunissami qaninnermi Ilulissat Icefjord – UNESCO World Heritage Site peqatigalugu takornariaqarnikkut centerimik pilersitsinissaq pilersaarutaavoq nunalu tamakkerlugu ineriartortinneqarnissaa pilersaarutaallunittaaq. Visit Greenland suliniummut uunga Kalaallit Nunaanni Namminersornerullutik Oqartussat aammalu Kommuunit takornariaqarnikkut centerinik piviusunngorsaanerup iluani suliniutaannik ersarissaanikkut tapersersuissaaq.

1. Nunat tamalaat akornanni angallannerup iluani angalatitsiviit sullitaanni eqimattat/aalajangersimasumik nalunaarsorsimasut malillugit misissuinerit pingaarnersiuinerillu, taakkunanilu Kalaallit Nunaannut takornariarnissamik soqutiginngittut pioreersullu eqqumaffiginissaat.

2. One-on-one Visit Greenlandip aammalu nunat tamalaat akornanni takornariaqarnikkut suliffeqarfiit Kalaallit Nunaannut angalarusuttunik sullitamik soqutigisaannik qalipaasersuerusullutillu paasisimasarnerorusuttut, taakkununngalu tulluuttumik misigisaqarnissamik nioqqutissanut ussassaarinissamik suliaqarusuttut akornanni ataatsimeeqatigiinnerit.

3. Ataatsimiittarnerit taamaattut tunngavigalugit nunat tamalaat akornanni Kalaallit Nunaannut tunngassuteqartumik suliaqarnerni naleqartitat ilutigalugit pingaarnersiuinerit ingerlanneqartarput.

4. Nunat tamalaat akornanni angalatitsiviit attuumassuteqarnerusut Kalaallit Nunaanni workshopertitsinerni FAM Tripsinik ingerlatsinissamut qaaqquneqartarput, taamaasillutik qanimut misigisassat neqeroorutigineqartullu timitalerlugit paasisimasaqarfigilernissaannut aammalu angalatitsiviit suleqatiginissaannut periarfissaqarlutik.

Visit Greenlandimut Kalaallit Nunaanni aammalu nunat tamalaat akornanni angalatitsiviit suleqatigiissinnaanerannut periarfissaliinissaq pingaaruteqarluinnarpoq, taamaasilluni Kalaallit Nunaanni takornariaqarnikkut ingerlatsisunut aammalu nunat tamalaat akornanni ingerlatsisunut sullitanut siammasinnerusumik paasissutissiinissamut periarfissaliisuulluni. FAM Trips aammalu nuna tamakkerlugu Workshopertitsinerit aningaasartuuteqarluartut ingerlassinnaajumallugit siumungaaq kommunit aammalu siunnersorteqarfiit peqatigalugit pilersaarusioreersimanissaq pingaaruteqarluinnarpoq.