Ultima Thule Kalaallit Nunaanni takornariartitsiviuvoq takorusutatit piumasatit kissaatitillu malillugit angalanissannut pilersaarusiornissamik periarfissiisoq.
Suut takornariarusussinnaavigit? Arsarnerit? Issittumi uumasut? Nunat nunarsuarmioqatigiit kingornussassaat Kalaallit Nunanniittut pingasuusut?
Ilaquttatillu takornariarnissat takorloorpiuk? Imaluunniit illoqarfiit ningorlugit pinngortitaq avatingiiseralugu silaannaq nillertoq najuussorlugu iluliarsuillu qimerloorusaajutaa eqqissisimaarnissat takorloorpiuk?
Takornariassallugit soqutigisannik oqaluttuutsigut illoqarfinni takornarialerisartut qanimut suleqatigaagut, taakku ilisimasaqarfigaat illoqarfiit oqaluttuassartaat pinngortitarlu najugartik. Angalanissarnik misigisassarsiornissannillu aaqqissuussinernik ikiorusuppatsigit, misigisassat tuniniakkallu aaqqissuuteriikkanik kissaateqaruit ataasiakkaanilluunniit misigisassanik inniminneerusukkuit.
Qaanaaq illoqarfiuvoq Kalaallit Nunaanni illoqarfiit avannarpasinnersaat. Tamaani piniarnermik ileqqutoqqat suli atuupput, soorlu piniagaq qaannamik naaleqqaarneqartarmat. Qaammammi aprilimi piniartut qaannatik nassarlugit immap sikuanut piniariartarput ilaanni sapaatip akunnerpaalunni sivisussuseqartumik. Aasakkut seqernup kaaviinnarnerani misigineqarsinnaavoq piniarluni aallarsimaarfiit alakkartissallugit qilalukkat qanimut takujumallugit.
Kalaallit Nunaanni iluliarsuit sermersuillu iigartarfii sinerissami ipput. Ilulissat eqqaat takornariaraanni naapitassat ilagaat iluliarujussuit issinerillu takornassallugit. Imaluunniit Kalaallit Nunaata kujataa takornariarukku siumorsinnaavatit nunat, savaatillit nunaataat qorsooqqillutik naggoreqisut avataanilu immami iluliarasaartut takornassallugit. Kangerlussuarmilu siumungassat ilagaat sermersuaq iigartartoqarfiusoq. Kangerlussuarlu kangerlummiikkami issittup uumasuinik takunissamut periarfissatsialaavortaaq.
Seqernup kaaviinnarnerani pisuttuarlutit misigisaqarit. Iluliarsuit qanimut qajartuarlutit anguarlutilluunniit misiginissaanut periarfissaqarputit.
Qaqqat innartorfigineqanngisaannarnikut innartukkit. Apusiuserlutit pisuttuarit aqissinillu qinaasillutit. Eqalliarnerittaaq misigisisnnaavatit. Kalaallit Nunaat silamiinnermik nuannarisartaqartunut timersortartunullu misigisassarsiffiulluarsinnaavoq.
Sequnngerit, iluliarpalaaq tusarnaaruk silaannarillu anersaartorfigiuk. Amerlasuut oqartarput Kalaallit Nunaanni kiffaanngissuseq puigunaatsorsiassaasartoq. Kalaallit inuunerat ulluinnaallu misigikkit, tamaani seqernup ingerlanga immallu ulittarlunilu tinittarnerata inuuneq sunnertarpaa. Kalaallit Nunaannut tikilluarit.