Kalaallit Nunaat

…SUULLU ATAATSIMOORFIGISAGUT TAMAKKERLUGIT

Asasara atuartoq

Kalaallit Nunaanni takornariaqarneq inuussutissarsiutaannaanngilaq – tassaavormi ataatsimoornitsinnik, inuiaqatigiiussutsitsinnik silarsuarmioqataanermillu ineriartortitsinissatsinnut periarfissaq. Mittarfissuit nutaat pingasut siornatigornit nunatsinnik tikikkuminarnerulersitsisut, inuiaqatigiiussutsitsinnullu naleqarnerulersitsisinnaasut kapitalimik nutaamik aallartitsipput. Ukiut tulliuttut qulit ineriartornermik periarfissanillu nassataqarumaarput, aammali periusissiornikkut toqqagassanik ataatsimoorlunilu iliuusissanik nassataqassallutik.

Naalakkersuisut nuna tamakkerlugu takornariaqarnermut pilersaarutaata, takornariaqarneq inuussutissarsiorfittut periusissiorfiusimasutut nuna tamakkerlugu naleqarnerulersitsisussatut naatsorsuuteqartigineqartumut saqitsippaa – tassaanngilarli anguniagaq, tassaallunili inuussutissarsiornerup, inuiaqatigiinnerup atugarissaanerullu ineriartortinnissaannut toqqammavissat ilaat.

Takornariaqarneq tikeraartuinnarnut tunngassuteqanngilaq. Inuiaqatigiiussutsitsinnummi ilaavoq, tamattalu takornariaqarnermut attuumassuteqarpugut. Takornariaqarneq nutaanik ineriartortitassatsinnik periarfissaqalersitsivoq – suliffissanik nutaanik aallarnisaanernillu attaveqaatinut atortulersuutinullu patajaatsunut akisussaassuseqarlunilu inuussutissarsiornermik ineriartortitsinissamut aamma periarfissiilluni.

Takornariaqarneq peqqinnissaqarfimmut siuarsaataassaaq, inissianik ineriartortitsinermut tunngavissiissalluni inuusuttunullu suliffissaqqissunik pilersitsissalluni. Nuna tamakkerlugu inuunermik pitsannguissaaq, ataatsimoorlutalu tulluusimaarutigisatsinnut siuarsaataassalluni. Nunarpummi tulluusimaarutigaarput.

Aamma takornariaqarnermik akisussaassuseqarluni ineriartortitsinissaq qularnaassavarput, nunattalu immikkorluinnaq ittuunerminut pissutigisai pinngortitarsuaq, piorsarsimassuseq inuiaqatigiittullu ataqatigiissuserput ataqqilluinnassallugit.

Pilersaarummi angorusutat iliuusinngortinneqarnissaannut Visit Greenlandimi pingaarutilimmik inissisimavugut. Periusissiarlu una siunissaq ungasinnerusoq eqqarsaatigalugu 2035-mut anguniagassiisuuvoq, nunalu tamakkerlugu takornariaqarnermi siunnersuisoqarfittut alloriaatissatsinnik siullernik nassuiaateqarfiulluni.

Ukiunut tulliuttunut qulinut periusissiaq una pingaartitanik, ilisimasanik misilittakkanillu ataatsimoorussatsinnik tunngaveqarpoq, nunatsinnilu piumasarineqartut naapertorlugit aammalu nuna tamakkerlugu, iluaqutaanerpaaqqullugu takornariaqanerup ineriartortinneqarnissaanik nalunaarutiginnittuulluni.

Visit Greenlandimi siulersuisut