“Isumaqatigiissut iluaqutigalugu Kalaallit Nunaat Islandimut attavilerneqassaaq takornariaqarnerlu ineriartortinneqarluni – tamanna Kalaallit Nunaannut Islandimullu iluaqutaassaaq,” Visit Greenlandimi pisortaaneq Anne Nivíka Grødem oqarpoq.
Icelandairip Visit Greenlandillu nittarsaassinermut isumaqatigiissutaat ukiuni marlunni atuuttoq ullumikkut atsioqatigiissutigineqarpoq. Tassani nunani tamalaani tusagassiuutitigut tuniniaasartunullu FAM-trips (ilisarisimatitsilernissamut angalatitsinerit) aqqutigalugit Kalaallit Nunaata soqutigineqarnerata ilisimaneqarneratalu annertusarnissaa sammineqarpoq. Isumaqatigiissut iluaqutigalugu Icelandairip timmisartuussivigisartagaanut amerlasuunut – Europami mittarfinniit Nordamerikami mittarfinnut attaveqalissaagut. Saniatigut aamma tuniniaaviit pingaarnerit pillugit ilisimasanik paarlaasseqatigiissinnaassaagut.
Oktober 2022-mi Kalaallit Nunaanni Islandimilu Naalakkersuisut Reykjavikkimi isumaqatigiissummik atsioqatigiipput, aningaasaqarneq, silap pissusaata allanngoriartornera piorsarsimassuserlu qitiutillugit. Piujuartitsisumik takornariaqarneq tassani aamma ilaatinneqarpoq. Isumaqatigiissutip atsiorneqarnera aamma massakkut pimmat nuannaarutigineqarpoq, 2024-mimi Nuummi Ilulissanilu mittarfissuit atulerpata, Amerikap avannaanut Europamullu toqqaannaq timmisartuussinissat periarfissanngussapput. Icelandairip aaqqissuussaani tuniniaavimmi Mid-Atlanticimi januarimi 2023-mi pisumi, Head of International Relations Tanny Por Visit Greenlandimeersoq aamma Director of Marketing Gísli S. Brynjólfsson, Icelandairimeersoq ataatsimiipput isumaqatigiissutissaq suliariniarlugu.
Director of Global Marketing, Gísli S. Brynjólfsson Icelandairimeersoq ima oqarpoq:
“Visit Greenlandi suleqatigalugu nunap tupinnarluinnartup, Islandimiit akunnialunnguit timmisartorluni anguneqarsinnaasup nittarsaannissaa qilanaaraarput. Icelandairip Europami Amerikallu avannaani angalaffigisartagaaniit, Keflavik aqqutigalugu Icelandairimullu billetsi ataaseq atorlugu Kalaallit Nunaannukarnissaq assut ajornanngilaq. Kalaallit Nunaanni mittarfiit tallineqareerpata takornariat misigisassarsioriartortut amerlanerusut timmisartuunnissaat qilanaaraarput.”
Visit Greenlandimi pisortaaneq Anne Nivíka Grødem ima oqarpoq:
“Kalaallit Nunaata ukiuni amerlasuuni nunat avannarliit suleqatigalugit nunani ungasissuni pingaarutilinni tuniniaavinnut, soorlu Nordamerikamut Kinamullu saqqumilaarneq anguniarsimavaa. Islandimut soqutiginninneq assut annertuvoq, suleqatigiinnerullu uuma Kalaallit Nunaata annertunerusumik saqqumilaarnissaanut periarfissanik tunisissaaq. Suleqatigiinnissarput qilanaaraarput.”
Icelandair Keflavikkimit (KEF) Kalaallit Nunaanni sumiiffinnut sisamat timmisartuussisarpoq.
Tikiffissaq | Angallannermut pilersaarut | Timmisartuussinerit amerlassusaat | Timmisatornerup sivisussusaa |
Nuuk (GOH) | Ukioq kaajallullugu | Sa. akunneranut tallimariarluni | 3:45 |
Ilulissat (JAV) | Juunip 1–niit Septemberip 30-anut | Sap. akunneranut qulingiluariarluni | 3:30 |
Narsarsuaq (UAK) | Juunip 1–niit Septemberip 30-anut | Sap. akunneranut marloriarluni | 2:55 |
Kulusuk (KUS) | Ukioq kaajallullugu | Sap. akunneranut tallimariarluni | 1:45 |
Icelandairimi attavik
Visit Greenlandimi attavik:
Continues further down the page...