TUSAGASSIORFINNUT NALUNAARUT Reykjavik 16. oktober 2023
Takornariartitsinerup suliffissuaqarneraneersut suliffeqarfiit 43-t tungaanoortut peqataapput sulissutigisatut atassuteqarfigisaminnik nunaniillu allaneersunik suleqatigisartakkaminnik ineriartortitseqataarusullutillu sakkortusaaniarlutik.
Angalaffiusinnaasunik nittarsaassineq NATA – North Atlantic Tourism Association-mit ingerlanneqarpoq, nunat avannarliit killiisa takornariartitsinermi Savalimmiut, Island aamma Kalaallit Nunaata akornanni ataatsimut peqatigiiffiat. Ukioq manna Island ingerlatsisuuvoq, sapaatillu akunnera una takornarianik ingerlatsisartut ataatsimoortinneqarput nunanit allaneersunik angalanermi agentinik naapitsisinnaaniassammata.
KALAALLIT NUNAAT KAJUMISSUSILIMMIK PILERISAARNEQARNERA
Nunat Avannarliit Killiisa pisortatigoortumik pilersaarutaasa ilaagaat Visit Greenland aamma Air Greenland ataatsimoorlutik angalaffiusinnaasunik nittarsaassinerup aallartinnissaanut sapaatip akunnera sioqqullugu Kalaallit Nunaanni angallassinermi ingerlatsinerat. Angalanerup taassuma siunertaraa angalanissamik aaqqissuussisartut, angalanermi agentit aammalu tusagassiortut Kalaallit Nunaanni ornigassanik nunaqavissunillu ingerlatsisumik nalorninaatsumik misigisaqarnissaat anguniarlugu, taamaalillutik tuniniakkatik sullittakkaminnut pitsaanerusumik paasillugillu nittarsaassinnaaniassagamikkit.
Angalanermi peqataasut aalajangersimasumik toqqagaapput, sullitat toqqammaviat piffinni takornarianik ingerlatsisut taakkulu tuniniagaannut tulluarsagaasimallutik. Ukioq manna angallassineq Aasianni, Qeqertarsuarmi Ilulissanilu ingerlanneqarpoq nunat ilaanni takornarianut kattuffiit aammalu takornariaqarnermi inuussutissarsiorneq qanimut suleqatigalugit ingerlanneqarpoq.
UNNUK KALAALERPALUTTOQ
Ukioq manna Visit Greenlandip Nunat Avannarliit Killiinut peqataasut Kalaallit Nunaannik soqutigisallik tamakkerlugit ataasinngorpat unnukkut pisussamut qaaqquai. Tassani nunat ilaanni takornarianut kattuffiit Kalaallit Nunaanneersut arfinillit takkuttut nunatsinni immikkuullarissunik misigineqarsinnaasunik sunniisinnaaniassammata. Taassuma saniatigut Air Greenland, Icelandair aamma Kalaallit Airports timmisartumik aqqusaarisarneq aammalu maannakkut qanoq ililluni Kalaallit Nunaannut tikittoqartarnera – siunissamilu – pilersaarutit pillugit oqaluttuarumaarput.
“Kalaallinik ingerlatsisunik suleqateqarnissamut soqutiginnittorpassuaqartoq nalaattarparput. Taamaammat unnuk manna suleqatigisartakkagut nunanit allaneersut pioreersut ilippanartullu Kalaallit Nunaat pillugu ilisimannillualernissaannik taperseeqataassaaq aammalu sukumiinerusumik assigiinngiiaassusitsinnik, attaveqaasersuutitsinnik aammalu kultoorerput pillugu paasinnilluarnissaannik tunniussissalluni. Taamatummi ililluta niueqatigisanik nalituunik ineriartortitsinissamik periarfissanik sakkortusaassaagut aammalu nunaqavissut ingerlatsisut agentillu nunanit allaneersut akornanni ikaartarfiliussalluta.” Visit Greenlandimi pisortaq, Anne Nivíka Grødem, oqaluttuarpoq.
Aaqqissuussinermi Greenland Tourism Award 2023-mi ajugaasoq aamma saqqummiunneqassaaq, takornarianik ingerlatsisup Kalaallit Nunaanni takornariaqarnermi piujuartitsisumik ingerlatsineranik immikkut suliniuteqarsimanera nersorniarlugu. Visit Greenland aamma Air Greenland suleqatigiillutik Greenland Tourism Award agguaanneqassaaq.
Nunat Avannarliit Killii B2B-uvoq (business to business) angalaffiusinnaasunik nittarsaassineq, takornarianik kajumissaarisoq, nunat avannarliit killiini ornigassanut tulluarsakkat, piujuartitsisumillu ineriartortitsinermi taperseeqataasoq – aningaasaqarnikkut, inuiaqatigiinnut avatangiisinullu. Angalanermi agentit tusagassiortullu aamma aaqqissuussisunit peqqissaartumik misissoqqissaarneqarnikuupput, taamaalillutik eqqortumik tulluarsagaapput.
Nittarsaassinerup anguniagaraa peqataasunut tulluartunik sinaakkusiinissaq ataatsimiinnissamut inniminniillutik imminnut naapissinnaaniassammata taamatullu nutaanik isumaqatigiissuteqarsinnaaniassammata, aammalu angalanermi agentit nunanit allaneersut nunallu avannarliit killiineersut takornarianik ingerlatsisut akornanni nalituunik atassuteqaateqalerniassammata.
Nittarsaassinermut Vestnordenimut tunuliaqutaavoq North Atlantic Tourism Association, taassanilu siunertaavoq nunat avannarliit killiisa takornariaqarnermik ingerlatsinerisa siuarsarnissaanut suleqatigiinnissaq. Taamaattumik Visit Faroe Islands, Visit Iceland aamma Visit Greenland nikittaallutik qaaqqusisuusarput.
Nunat Avannarliit Killii pillugit paasisaqarnerorusukkuit https://vestnorden.com/
Research & Public Affairs Consultant, Rosannguaq Rossen, attavigiuk paasisaqarnerorusukkuit: rosa@visitgreenland.com, tlf. +299 52 68 82