Taakku tassaapput apeqqutit suliffeqarfiit takornarialerinermut inuiaqatigiinnullu attuumassuteqartut arfineq-pingasuusut – Air Greenlandip, KAIR-ip, Grønlandsbankenip, Grønlandsbankenimi Inuussutissarsiornermut Aningaasaateqarfiup, Nalik Venturesip, AECO-p aamma SIKUKI-p, Visit Greenland siuttoralugu – isumaliutigitigisaasa ilaat. Suliffeqarfiit taakkua tamarmik kissaatigaat siunissami Kalaallit Nunaanni takornarialerineq pillugu suliaqaqataassallutik tamatumunngalu pilersaaruteqassallutik, taamaattumillu allamiut Kalaallit Nunaannut takornariartarnerisa aningaasarsiornikkut naleqassusiata qulaajarneqarnissaa siunertaralugu peqatigiillutik misissueqqissaassallutik suliniutigilerpaat.
”Takornariaqarnerup pitsaanerusup imminullu nappassinnaanerusup anguniarnerani paasissutissat pisariaqartut takornarialerinerup iluani inuit, avatangiisit aningaasarsiornerullu eqqarsaatigalugit isikkivinnik qulaajaassutaasussat pingaaruteqaqaat. Misissueqqissaarnikkut matumuuna peqatigiilluta kissaatigaarput takornarialerinerup inuiaqatigiit aningaasarsiorneranni iluanaarutaasussanut kisitsisitigut najoqqutassat pissarsiarerusuppavut, ilaatigut takornarialerinerup ineriartortinnissaanut attaveqaqatigiittarnitsinni paaseqatigiissinnaanerujumalluta, ilaatigullu takornarialerinikkut aningaasarsiornerup siunissami sunniuteqarnissaanut nutaanik anguniagassikkumalluta,” Visit Greenlandip pisortaa Anne Nivíka Grødem oqaaseqarpoq.
Mittarfissuit nunanut allanut atassuteqalersitsisussat nutaassat takornarialerinerlu pillugu pilersaarut nutaassaq eqqarsaatigalugit misissueqqissaarnermik suleqatigiissuteqartut Kalaallit Nunaanni paasissutissanik takornarialerinermut imminut nappassinnaasumut sinaakkusiinissamut atorneqarneqarsinnaasunik paasissutissaateqalernissamut ataatsimut akisussaaffeqarlutik iluaqusiinissartik kissaatigaat. Taamaattumik aasaq paasissutissarpassuarnik katersuisoqarpoq, takornarialerinermillu inuussutissarsiutillit peqatigalugit paasissutissat pisariaqartinneqartut timmisartutigut umiarsuartigullu takornariaqarnermut tunngassuteqartut katersorneqarlutik.
Naatsorsuutigineqarpoq misissueqqissaarneq 2024-p aallartisimalernerani naammassineqassasoq tamanillu pissarsiarineqarsinnaalissasoq, tamatumani siunertarineqarluni takornarialerinermik inuussutissarsiutilinni, inuiaqatigiinni oqartussanilu soqutigisaqaqatigiit piviusunik tunngaveqarlutik oqallittarnerisa pitsanngorsarneqarnissaat. Inernerittaaq takornarialerineq eqqarsaatigalugu pilersaarusiat piulerumaartussat ineriartortinnissaannut tamatumalu kingornagut inatsisiliornissanut tunngavisseeqataajumaarput.
Suliniummik suleqatigiissuteqartut kaammattuutigaat Kalaallit Nunaanni takornarialerinerup inuiaqatigiinnit aningaasarsiorfittut misissoqqissaarneqarnera sukumiisoq tutsuiginartorlu qulakkeerniarlugu amerlasuut suliniuteqaqataassasut peqataatinneqassasullu. Taamaattumik tamatuminnga soqutiginnittut paasissutissanik naleqquttunik ilanngussaqarnissaminnik kissaateqartut kaammattorneqarput misissueqqissaartarfik Rambøll misisissueqqissaarnerup suliarineqarnerani suleqatigineqartoq attavigeqqullugu.
Rambøllimi attaveqarfissaq mge@ramboll.com, tlf +45 5161 2249
Paasisaqarnerorusukkuit Visit Greenlandimi pisortaq Anne Nivíka Grødem attavigiuk: nivika@visitgreenland.com, tlf. +299 56 02 82
Continues further down the page...
