Visit Greenlandip Skandinaviami, Frankrigimi, Amerikami Avannarlermi, Tysklandimi aamma Tuluit Nunaanni takornariaqarnikkut niueqatigineqartunik pingaarnernik misissueqqissaarnini naammasseqqammerpai. Niueqatigineqartut taakku nunatta angalaffissatut ineriartortinneqarnissaanut periusissiornermi pingaaruteqarnerat pissutigalugu takornarialerinermi siunnersuisunit nunatsinneersunit pingaarnerpaatinneqarput.
”Niueqatigineqartunik misissueqqissaarnerit malunnaatilimmik kingunilimmik aningaasaliissuteqarsimanerput takutippaat, takornarialerisullu niueruteqarniarnerisa siuarsarneqarnissaannut ilusiligaallutik. Niueqatigineqartunik misissueqqissaarnernut aningaasaliisimanitsigut takornariaqarneq eqqarsaatigalugu sullinniakkatsinnik unammillertigisatsinnillu paasisaqarneruliinnanngilagut, aammali siornatigut misissorneqarsimanngitsunik periarfissanillu takornarialerinerup siuarsarneqarnissaanut pingaaruteqarluinnarsinnaasunik paasisaqarpugut. Niuernikkut periarfissanik pingaarutilinnik paasisimasaqalersitsinerup saniatigut takornarialerisut neqeroorutigisaannik niueruteqarsinnaasunit eqqornerusunit kajungerfigineqarnerulernissatsinnuttaaq misissueqqissaarsimanerput iluaqutissiissaaq,” Visit Greenlandip pisortaa, Anne Nivíka Grødem, nassuiaavoq.
Niueqatigineqartunik misissueqqissaarnerit ilaatigut takutippaat siornatigut misissuisimanernut (2016-2018) sanilliullugu nunarput takornariarfissatut soqutigineqarneruleriartortoq. Taamaattoq takornariat misigisassarsiorumatuut tamakku eqqarsaatigalugit ornigassanit allanit unammillerluarneqarpugut, unammilleqatigiinnerlu ’eqqortumik akeqartitsiniarnissamut’ tunngassuteqartorujussuuvoq. Pinngortitarsuaq innarlerneqarsimanngitsoq misigisassallu pinngortitameersut niuerfinni tamani soqutigineqarnerujussuupput, kisianni 2016-2018-imit kulturikkut misigisassarsiorusunnermut soqutiginninneq qaffariaannarsimavoq. Tamakkualu saniatigut misissuinerup takutippaa takornariarsinnaanerminnut ilimanaatillit nunarput pillugu paasissutissanik pingaarnertut nittartakkatigut pissarsiniartarsimasut.
Niueqatigineqartunik misissueqqissaarnerit ineriartornerup, niuerfigineqarsinnaasut, ineriartorfissatut periarfissat aammalu takornariaqarnikkut illuaqqajaaffigineqartut nutaat paasinissaannut takornariaqarneq eqqarsaatigalugu pingaarutilittut isigineqartariaqarput. Tamakkuami paasisaqarfiginerisigut takornarialerisut isumalluutitik nioqqutigisatillu sullissassaminnut tunnganerulersissavaat, taamalu ineriartorfigisinnaasatik atorluarnerulissallugit.
Visit Greenlandip pisortaa itisiliivoq: ”Nammineq niuerfigisanik paasisarneq tamatumanilu periarfissanik ilisimasaqarneq suliffeqarfinni tamaginni ingerlalluarnissamut pingaaruteqaqaat. Tamanna pujorsiuteqarnertut ippoq, periarfissanut pingaarutilinnut tikkuussisarmat. Tamakkuninngami ilisimasaqanngikkutta isumalluutivut atorfissaqanngitsunut atulussinnassavavut. Taamaalilluni niuerfigineqarsinnaasunik ilisimasaqarnerup piumaneqartut, atorfissaqartinneqartut kissaatigineqartullu suunerinik paasinnissinnaassuseqartissavaatigut, piffissanilu eqqortuni eqqortunik neqerooruteqarlutalu sullissisinnaanissatsinnik periarfississalluta. Paasisimasaqarnerumuna tamatuma ilisimasaqarluarluta aalajangiisinnaassuseqartissagaatigut, periusissiornikkut suleqatissarsitissinnaassalluta kiisalu aaqqiissutissanik nutaaliorfiusunik imminullu nappassinnaanermik tunngaveqartunik misigisassarsiorfissatut uatsinnut siuttuulersitsisussanik ineriartortitsisissalluta.”
Visit Greenlandip kissaatigaa niueqatigineqartunik misissueqqissaarnerit taakku nunatsinni takornariaqarnerup ineriartortinneqarneranut ingerlalluarneranullu iluaqusersuutaajumaartut.
Continues further down the page...
