Filmi Visit Greenlandimit suliarineqarpoq, nunattalu assigiinngiiaarfiusup filmiliakkut nersorneqarnissaa takornariaqarnerullu imminut nappassinnaasup akisussaassuseqarfiusullu saqqummersinneqarnissaat siunertarisimavagut.
Nunarput nunaavoq immikkorluinnaq ittoq, takornariaqarneq imminut nappassinnaasoq pillugu allaalluinnartumik eqqarsarfiusariaqartoq. Nunammi ilarujussuani angallavissat isorartoqalutillu amigaatiginaqisut takornariaqarnerup imminut nappassinnaasup qulakkeernissaanut allaanerusumik iliorfiusariaqarput.
Uagutsinnullu pingaaruteqarpoq najugaqartut pitsaasumik atugaqarnerisa innimigineqarnissaat. Isumaqarpugummi najugaqarfitsialak tassaasortaaq takornariagassatsialak.
Festivalimi ataqqisaasumi akisussaassuseqarneq takornariaqarnerlu imminut nappassinnaasoq pillugit isiginnaagassiarput takutissinnaagatsigu filmillu nunarsuarmit tamarmeersut piujuartitsiniarnermik tunngaveqartut pitsaanerpaat ilaattut saqqummiunneqarnera qujamasuutigaarput.
Innersuunneqarneq akissarsitinneqarnerlu Visit Greenlandip piginnaassusiinik minnerunngitsumillu nunatta takornariarfissatut ornigassaaneranik pitsaasumik takutitsipput.
Visit Greenlandimi sulisut suliamik matuminnga suliaqartortavut immikkut qutsaviginiarpakka, sulilluarnerisa tunniusimanerisalu filmimik nunatsinni nunarsuarmilu nuannarineqartumik pilersitsisinnaatimmatigut.
Nunatsinni takoriariaqarneq imminut nappassinnaasoq siuarsarlugu sulinerput nangissavarput oqariartuutiginiakkavullu allaasunik nassaarsiornitsigut ingerlateqqinniarumaarlugit.
Sølvimik akissarsitinneqarneq una nunatta misigisassarsioriarluni takornariarfissatut nunarsuarmioqatitsinnit ilisimaneqalernissaanik anguniagaqarnitsinnut kajumissaataaqaaq.
Deauville Green Awardsimut, nunatsinni suleqatigisimasatsinnut tamanut minnerunngitsumillu misigisassarsiorumallutik tikeraarsimasunut nunatta imminut nappassinnaasumik takornariaqarfiusinnaanissaanik qulakkeerinnittunut qujavugut.
Akissarsitinneqarnerput Kalaallit Nunaannut pigitipparput.
Anne Nivíka Grødem, Visit Greenlandimi pisortaq
Continues further down the page...
